АҚШ Конгрессининг вакиллар палатаси январь ойида Дональд Трамп тарафдорларининг Капитолийга қилган ҳужумини текшириш учун мустақил комиссия тузиш қарорини қўллаб-қувватлади, деб ёзмоқда CNN.

Фото: «Belvpo.com»

Тегишли қонун лойиҳасини 252 нафар конгрессмен маъқуллаб, 175 нафари қарши чиқди. Партия раҳбариятининг позициясидан фарқли равишда, 35 нафар республикачи ҳам ушбу қарорни қўллаб-қувватлади ва қарорни маъқулламасликка чақирган собиқ президент Дональд Трампга қарши эканини намойиш этди.

Энди ҳужжат Сенат томонидан маъқулланиши керак. Айни пайтда Конгресснинг юқори палатасидаги республикачилар гуруҳларининг етакчиси Митч Макконнелл қонун лойиҳасига қарши эканини айтди.

Ушбу овоз бериш республикачилар ва демократлар ўртасида комиссия вазифалари бўйича тўрт ой давом этган баҳсларга якун ясайди. Демократлар комиссиядан 6 январь куни Капитолий ҳужумига сабаб бўлган воқеаларга эътибор қаратишни талаб қилган. Ўз навбатида, республикачилар раҳбарияти комиссияга 2020 йилги норозиликларни ҳам текшириш таклифини киритган.

Қонун лойиҳаси ҳар бир томоннинг тенг вакиллик ва гувоҳларни терговга чақириш ҳуқуқига эга бўлган 10 кишидан иборат комиссия тузишни назарда тутади.

Комиссия «6 январь куни Капитолийга қилинган ҳужум фактлари ва ҳолатларини ҳамда демократияга қилинган ҳужумни келтириб чиқариши мумкин бўлган омиллар»ни ўрганиши керак бўлади.

Аввалроқ 6 январь куни уйиштирилган ҳужумдан кейин Капитолийни таъмирлаш учун 30 миллион доллар талаб этилиши маълум бўлди. Ҳужумда 300 нафардан ортиқ одам айбланди ва уларнинг энг камида 280 нафари ҳибсга олинди.

Эслатиб ўтамиз, 6 январь куни конгресс аъзолари Дональд Трампнинг президентлик сайловларида мағлуб бўлганини тасдиқлаш учун йиғилган вақтда унинг тарафдорлари Конгрессга бостириб кирган. Полиция бир неча соат ўтибгина намойишчиларни Капитолийдан ҳайдаб чиқаришга муваффақ бўлган. Ҳуқуқ-тартибот органлари ходимлари ўқотар қурол, дубинка, кўздан ёш оқизувчи газдан фойдаланган. Капитолийнинг хавфсизлик ходими билан биргаликда, беш киши ҳалок бўлган. АҚШ ҳукумати ҳужум иштирокчиларига қарши 100 дан ортиқ иш очди.