AQSh Kongressining vakillar palatasi yanvar oyida Donald Tramp tarafdorlarining Kapitoliyga qilgan hujumini tekshirish uchun mustaqil komissiya tuzish qarorini qo‘llab-quvvatladi, deb yozmoqda CNN.
Tegishli qonun loyihasini 252 nafar kongressmen ma’qullab, 175 nafari qarshi chiqdi. Partiya rahbariyatining pozitsiyasidan farqli ravishda, 35 nafar respublikachi ham ushbu qarorni qo‘llab-quvvatladi va qarorni ma’qullamaslikka chaqirgan sobiq prezident Donald Trampga qarshi ekanini namoyish etdi.
Endi hujjat Senat tomonidan ma’qullanishi kerak. Ayni paytda Kongressning yuqori palatasidagi respublikachilar guruhlarining yetakchisi Mitch Makkonnell qonun loyihasiga qarshi ekanini aytdi.
Ushbu ovoz berish respublikachilar va demokratlar o‘rtasida komissiya vazifalari bo‘yicha to‘rt oy davom etgan bahslarga yakun yasaydi. Demokratlar komissiyadan 6-yanvar kuni Kapitoliy hujumiga sabab bo‘lgan voqealarga e’tibor qaratishni talab qilgan. O‘z navbatida, respublikachilar rahbariyati komissiyaga 2020-yilgi noroziliklarni ham tekshirish taklifini kiritgan.
Qonun loyihasi har bir tomonning teng vakillik va guvohlarni tergovga chaqirish huquqiga ega bo‘lgan 10 kishidan iborat komissiya tuzishni nazarda tutadi.
Komissiya “6-yanvar kuni Kapitoliyga qilingan hujum faktlari va holatlarini hamda demokratiyaga qilingan hujumni keltirib chiqarishi mumkin bo‘lgan omillar”ni o‘rganishi kerak bo‘ladi.
Avvalroq 6-yanvar kuni uyishtirilgan hujumdan keyin Kapitoliyni ta’mirlash uchun 30 million dollar talab etilishi ma’lum bo‘ldi. Hujumda 300 nafardan ortiq odam ayblandi va ularning eng kamida 280 nafari hibsga olindi.
Eslatib o‘tamiz, 6-yanvar kuni kongress a’zolari Donald Trampning prezidentlik saylovlarida mag‘lub bo‘lganini tasdiqlash uchun yig‘ilgan vaqtda uning tarafdorlari Kongressga bostirib kirgan. Politsiya bir necha soat o‘tibgina namoyishchilarni Kapitoliydan haydab chiqarishga muvaffaq bo‘lgan. Huquq-tartibot organlari xodimlari o‘qotar qurol, dubinka, ko‘zdan yosh oqizuvchi gazdan foydalangan. Kapitoliyning xavfsizlik xodimi bilan birgalikda, besh kishi halok bo‘lgan. AQSh hukumati hujum ishtirokchilariga qarshi 100 dan ortiq ish ochdi.
Izoh (0)