Путин Тожикистон билан биргаликда ҳаво ҳужумига қарши мудофаа тизимини яратиш бўйича битим имзолашни буюрди

Россия президенти Владимир Путин Тожикистон билан биргаликда минтақавий ҳаво ҳужумига қарши мудофаанинг ягона тизимини яратишни маъқуллади. Тегишли буйруқ ҳуқуқий маълумотлар расмий порталида эълон қилинди, деб ёзади «РБК».

«Россия Федерацияси ва Тожикистон Республикаси ҳамкорликда минтақавий ҳаво ҳужумига қарши мудофаа тизимини яратиш бўйича икки давлат ўртасида битим имзолаш тўғрисида Россия ҳукумати таклиф қабул қилсин», — дейилади ҳужжатда.

Давлат раҳбари Мудофаа вазирлиги ва Ташқи ишлар вазирлигига Тожикистон билан шартнома тузиш бўйича музокараларни бошлашни буюрди.

Ҳукумат келишув лойиҳасини 12 май куни эълон қилган эди. Унинг матни Мудофаа вазирлиги томонидан тайёрланган. Келишув иккала мамлакатнинг минтақадаги ҳаво ҳужумига қарши мудофаа кучларининг биргаликдаги ҳаракатларини мувофиқлаштиришни назарда тутади. Умумий етакчиликни Россиянинг Марказий ҳарбий округи кучлари қўмондони амалга оширади.

Келишувни томонлардан бирининг қарорига кўра бекор қилиш ҳуқуқи билан номаълум муддатга тузиш таклиф этилади.

Путин 8 май куни Тожикистон раҳбари Эмомали Раҳмон билан учрашган эди. Учрашув давомида томонлар минтақавий хавфсизлик масалаларига тўхталиб ўтган. Россия президенти Афғонистондаги воқеалардан хавотир билдириб, Тожикистон ушбу мамлакат билан энг узун чегарага эга эканини таъкидлаган. Эмомали Раҳмон, ўз навбатида, Афғонистондан АҚШ қўшинларининг олиб чиқилиши эълон қилинганидан кейин вазият кескинлашганига ишора қилган.

Путин Россия қуролли кучларини кучайтириш бўйича иш олиб бораётганини қўшимча қилиб, тегишли мақсадли дастур мавжудлигини эслатиб ўтган.

Аввалроқ Россияда Беларусь ва Арманистон билан ҳамкорликда тузилган минтақавий ҳаво ҳужумига қарши мудофаа тизимлари мавжудлиги айтилган.