Беларусь президенти Александр Лукашенко «Беларусь Республикасининг миллий хавфсизлигини таъминлаш тўғрисидаги қонунга ўзгартириш киритиш тўғрисида»ги қонунни имзолади. Хусусан, унга кўра, милиция ходимлари оммавий тартибсизликлар иштирокчиларига қарши ҳарбий ва махсус жиҳозлардан фойдаланиш ҳуқуқига эга бўлди. Бу ҳақда «Интерфакс» хабар берди.

Фото: AP Photo

Қонунда хавфсизлик ходимларининг жисмоний куч ишлатиши, қурол-яроғ, ҳарбий ва махсус техника воситаларидан фойдаланиш шартлари, чегаралари, шунингдек, тинтув ўтказиш қоидалари ҳамда муайян ҳуқуқ ва мажбуриятлари белгилаб берилди. Қонун бир ойдан кейин расман эълон қилингач, кучга киради.

Қонунга мувофиқ, агар қурол-яроғ ва махсус воситалардан фойдаланиш хавфсизлик органларининг фаолиятини тартибга солувчи меъёрий ҳужжатларнинг талабларига мувофиқ амалга оширилган бўлса, милиция ходимлари бунинг оқибатида етказилган зарар учун жавобгарликни ўз зиммасига олмайди.

Шунингдек, жамоат тартиби ва хавфсизлигини таъминлаш мақсадида милиция ходимлари фуқароларнинг процессуал ҳаракатларни видео, кино ва фототасвирга туширишини, шунингдек, хизмат пайтида атроф-муҳитни, фуқароларни овозли ва видеоёзувга муҳрлашини тақиқлаш ҳуқуқига эга бўлади.

Бундан ташқари, милиция ходимларига ҳибсга олиш вақтида фуқароларни, уларнинг буюмларини ва машиналарини текширувдан ўтказиш ваколати берилади. Шунингдек, қонунда ички ишлар органларига шахсларнинг ёзма розилигисиз ахборот тизимларидан, шу жумладан, шахсий маълумотлардан ҳеч қандай тўсиқсиз фойдаланиш ҳуқуқини тақдим этиш тўғрисидаги таклиф мавжуд.

Қонун янгиликлари орасида ички ишлар органларини ҳарбийлаштирилган ташкилотлар қаторига киритиш, ички ишлар органлари функцияларини амалга оширишнинг ошкоралигини чеклаш, кибержиноятчиликка қарши кураш бўлинмалари ҳамда фуқаролик ва миграция бўйича ҳудудлараро бирликларни яратиш каби таклифлар берилган.

Шунингдек, президент судьялар, ҳукумат соқчилари ва полиция давлат томонидан ҳимоя қилиниши тўғрисидаги қонунга тузатишлар киритиш тўғрисидаги фармонни имзолади. Ушбу ўзгартиришлар қонуннинг президент ҳузуридаги Оператив-таҳлил марказининг ҳарбий хизматчилари ва фуқаролик хизматчиларига нисбатан амал қилишининг кенгайтирилишини назарда тутади. Хусусан, агар қўриқланаётган шахслар бошқа воситалар билан ҳимоя қилиш мумкин бўлмаган ҳолда, қонун уларга ташқи кўринишини ўзгартириш учун рухсат беради.

Аввалроқ Лукашенко «Суверенитет ва конституциявий тузум ҳимояси тўғрисида»ги декретни (қонун кучига эга бўлган қарор, фармойиш) имзолаган эди. Ушбу ҳужжат давлат раҳбарининг суиқасд, террорчилик ҳаракати, ташқи тажовуз ва бошқа зўравонлик ҳаракатлари натижасидаги ўлими юз берган тақдирда, барча давлат органлари ва уларнинг мансабдор шахслари Хавфсизлик кенгаши (унинг мажлисларида бош вазир раислик қилади) қарорларига мувофиқ ҳаракат қилишини кўзда тутади.

Шунингдек, Лукашенко унинг ҳаётига суиқасд қилиш ва давлат тўнтаришини тайёрлашга оид иш бўйича янги маълумотларни эълон қилишга ваъда берганди. Лукашенко аввал эълон қилинган маълумотлар воқеаларнинг кичик бир қисми эканини ва одамлар тафсилотлар билан тўлиқ танишса, «ҳайратга тушиши»ни таъкидлаганди.