Жаҳон соғлиқни сақлаш ташкилоти экспертлари мунтазам равишда ортиқча ишлаш ўлим хавфига олиб келиши мумкинлигидан огоҳлантирди. Бу ҳақда ЖССТ ва Халқаро меҳнат ташкилотининг 17 майдаги ҳисоботига таяниб, «Korrespondent.net» хабар берди.
Ҳисоботда қайд этилишича, хавфли чегара — ҳафтасига 55 соатлик иш. Шундан сўнг ходимнинг соғлиғида муаммолар юзага кела бошлайди.
«Тадқиқотларга кўра, ҳафтасига 55 соат ва ундан ортиқ ишлаш ҳафтасига 35-40 соат ишлайдиганлар билан таққослаганда инсульт хавфини 35 фоизга, юрак ишемик касалликларини 17 фоизга ошишига олиб келади», — дейилади ЖССТ хабарида.
Шунингдек, таъкидланишича, 2016 йилда дунё бўйлаб 398 минг киши инсультдан ва 347 минг киши юрак касалликларидан вафот этган. Ушбу ўлим ҳолатлари айнан ортиқча ишлаш ҳолатлари билан боғланмоқда.
Экспертларнинг қайд этишича, ортиқча ишлаш, айниқса, эркаклар соғлиғига салбий таъсир кўрсатади — барча ўлим ҳолатларининг 72 фоизи. Шу билан бирга, кўп ишлайдиган инсонлар сони «ўсиб бормоқда ва ҳозирда дунё аҳолисининг 9 фоизини ташкил этади».
«Ҳеч бир иш инсультга чалиниш ёки юрак касаллиги хавфига дучор бўлишга арзимайди», — дейди ЖССТ бош директори Тедрос Гебрейесус.
Изоҳ (0)