Кўпчилик бош оғриши, кўз олдининг қоронғилашиши сингари аломатларга эътибор бермайди ва бефарқ қарайди. Аммо айнан мазкур белгилар саломатликда жиддий муаммо борлигидан дарак бериши мумкин.
Қандли диабет
Қонда қанд миқдорининг меъёрда бўлиши, беморда қанд касаллиги йўқлигини билдирмайди. Ушбу касаллик энди ривожланаётган вақтда яққол симптомлар деярли бўлмайди. Чанқаш, оғизнинг қуриши, тез-тез пешоб ажралиши ва кўриш қобилиятининг сусайиши безовталанишга сабаб бўла олади. Тери, хусусан, бўйин ва қўлтиқ ости соҳасининг қорайиши ҳам қандли диабетга хос белгилардан бири саналади.
Нима қилиш керак?
Қандли диабет аксарият ҳолларда 45 ёшдан ошган беморларда кузатилгани сабаб ҳам шу ёшдан кейин шифокор назоратидан ўтиб туриш керак. Қон босими юқори, ортиқча вазнли ва қондаги холестерин миқдори юқори бўлган кишиларнинг ҳам касалланиш хавфи юқори эканлигини инобатга олиб, саломатликка эътиборли бўлиш керак.
Тухумдонлар поликистози синдроми
Маълумотларга қараганда, 10 фоиз туғиш ёшидаги аёллар мазкур касалликдан азият чекади. Мазкур касаллик организмда эркакларга хос гормоннинг кўпайиб кетиши оқибатида овуляция ва менструал цикл бузилиши билан намоён бўлади. Қолаверса, ушбу синдром апноэ, иккинчи турдаги қандли диабет ва юрак касалликларига ҳам олиб келиши мумкин.
Нима қилиш керак?
Организмни кузатиш керак, ушбу синдром сабаб юзда ҳуснбузарлар тошиши, соч толалари ингичкалашиши танада эса кўпайиши мумкин. Шу каби белгилар сезилганда шифокорга боришни ортга сурмаслик керак.
Қон босими
Олимларнинг фикрича, ер юзидаги 50 фоиз одам қон босимининг юқорилиги ҳақида билмайди. Қон босимининг юқори экани аввалига сезилмаслиги, аммо қон-томирларни зарарлаб, бир кун келиб инфаркт ёки инсультга олиб келиши мумкин.
Нима қилиш керак?
Ўзингизни ёмон ҳис қилмаган тақдирда ҳам, йилда бир марта бўлса-да, қон босимингизни ўлчаб туринг. Бунинг учун шифокорга бориш ёки тонометр харид қилиш керак бўлади.
Глаукома
Жуда ҳам секин ривожлангани сабаб бемор ўзида глаукома борлигини сезмаслиги мумкин. Кўз қон босимининг юқори эканидан келиб чиқадиган мазкур муаммо кўз олди хиралашиши, оқибатда эса кўрмай қолишга ҳам олиб келиши мумкин.
Нима қилиш керак?
Аксарият ҳолларда касаллик 40 ёшдан катта кишиларда ривожлангани сабаб ҳар йили мутахассисга бориб, кўзларни текширтириб туриш керак.
Уйқуда апноэ хуружи (нафас олишнинг тўхташи)
20 ёшдан 70 ёшгача бўлган 50 фоиз аёллар апноэдан азият чекади. Уйқу вақтида нафас олишнинг қисқа муддатга тўхташи оқибатида қонда кислород камайиши билан намоён бўладиган апноэ аёлларда 90 фоиз ҳолатда аниқланмайди ва бу эркакларга хос касаллик деб ҳисобланади. Бунга эса уларда хуррак отиш ва кундузи уйқу босиши сингари симптомларнинг кузатилмаслиги сабаб бўлади. Аммо уйқусизлик, тонгда бош оғриши, чарчоқ, депрессия, шунингдек, хавотирланишнинг ошиши шифокорга мурожаат қилиш учун жиддий сабаб бўлиши керак.
Нима қилиш керак?
Апноэга хос симптомлар кузатилганда дарҳол шифокорга мурожаат қилиш керак. Текширувдан кейин мутахассис сизга нима қилиш керак ва керакмаслиги ҳақида индивидуал маслаҳат беради.
Ўпка саратони
Ўпка саратони одам учун энг хавфли касалликлардан бири ҳисобланади. Дастлабки босқичларда ривожланаётгани сезилмаслиги, нафақат чекадиган, балки сигаретни оғзига олмаган кишиларда ҳам мазкур муаммо кузатилиши мумкин.
Нима қилиш керак?
Чекадиган инсонлар, айниқса, ўпкаларини текширтириб туриши керак. Кўкрак соҳасида оғриқ, нафас олишнинг қийинлашиши, икки ҳафтадан узоқ вақтдан буён давом этаётган қуруқ йўтал сингари симптомлар ташвишланишга сабаб бўла олади.
Изоҳ (0)