Чехия президенти Врбетицадаги портлашлар сабабини камомадни яширишга уриниш деб атади. Бош вазир воқеада фақат Россиядан гумон қилинаётганини айтди
Россия махсус хизматларининг қўли бор, дея гумон қилинаётган 2014 йилда Чехиянинг Врбетица қишлоғидаги ўқ-дорилар омборларида содир бўлган портлашларнинг сабаби камомадни яширишга уриниш бўлган бўлиши мумкин. Бу ҳақда Чехия президенти Милош Земан ўз интервьюсида айтиб ўтди, деб ёзади Meduza.
Давлат раҳбарининг сўзларига кўра, ушбу версия ҳақида унга Чехия адлия вазири Мария Бенешева айтган. Земан Врбетицадаги воқеа сабабининг дастлабки версияси ўқ-дориларни сақлашда бепарволикка йўл қўйилиши эканини эслатиб ўтди. Президент воқеага оид учала тахминнинг ҳеч бирига тарафдорлик қилмаётганини айтди.
Чехия бош вазири Андрей Бабиш Земаннинг ушбу баёнотига қуйидагича изоҳ берди: «Мен президентга полиция фақат битта версия устида текширув олиб бораётганини айтгандим. 2014 йилдан бери ўтказилган текширув жараёнида ундан кўпроқ тахминларга дуч келинган бўлиши мумкин. Аммо президент нима учун версиялар кўпроқ эканини таъкидлаётганини изоҳлаб беролмайман».
Земаннинг сўзларини унинг ўзи манба сифатида келтирган Мария Бенешева ҳам рад этди. «Менда полиция Россия Қуролли Кучлари Бош разведка бошқармасининг аралашувидан бошқа версия билан ишлаётгани ҳақида ҳеч қандай маълумот йўқ», — деди у журналистларга.
Аввалроқ Чехия Врбетицадаги портлашлар учун Россиядан 47 миллион доллар товон пули талаб қилмоқчилиги ҳақида хабар берилган.
Шунингдек, Чехия бош вазири Андрей Бабиш Евроиттифоқ мамлакатлари раҳбариятини Врбетица қишлоғидаги портлашлар ҳақидаги иш бўйича Чехия ҳукумати билан бирдамлик рамзи сифатида ҳеч бўлмаганда бир нафардан Россия дипломатларини чиқариб юборишга чақирган эди.
Чехия Россияни 2014 йил 17 апрелда Моравиянинг жануби-ғарбий қисмидаги ўқ-дорилар омборида содир бўлган портлашларга алоқадорликда айблаганидан кейин улар ўртасидаги кенг кўламли сиёсий-дипломатик низо пайдо бўлди. Шундан сўнг Прага қиймати 6 миллиард евро бўлган «Дуковани» атом электр станциясининг янги энергия блокини қуриш бўйича тендерда иштирок этиш учун «Росатом» давлат корпорациясининг номзодлар сафидан чиқарилишини эълон қилди.
Бунинг ортидан Чехия 18 нафар россиялик дипломатни мамлакатдан чиқариб юборди. Бунга жавобан Москва ҳам 20 нафар чехиялик дипломатни мамлакатдан чиқариб юборди.
