Бухоро вилояти Қоракўл туманидаги «Шўработ» МФЙда жойлашган масжид биноси вилоят Маданий мерос бошқармаси мутахассислари томонидан ўрганилди.
Аниқланишича, масжид биноси XIX асрнинг иккинчи ярмида, яъни 1884—1885 йилларда маҳалла-гузар масжиди сифатида қурилган. Масжид ёғоч конструкцияли бўлиб, устун, тўсин ва «боғдоди» эшиклари ёғоч ўймакорлиги билан безатилган. «Г» ҳарфи шаклидаги етти устунли айвони ҳозирда сақланмаган, унинг ўрнида ХХ аср охирларида қурилган айвон мавжуд.
Ҳозирги кунда ушбу масжидда қишлоқ кутубхонаси (Қоракўл тумани кутубхонаси филиали) жойлашган.
Шунингдек, мутахассислар иштирокида ўтказилган илмий ўрганишлар натижасида масжид устунига ўйиб ёзилган тарихий ёзув — араб алифбоси асосидаги форс тилида насталиҳ хатидаги ёзув эканлиги аниқланган. Унинг мазмуни: «Бу масжид Ғайбуллобой ўғли Рўзибой томонидан ҳижрий 1304 йилда қурдирилган».
Аввалроқ Ичанқалъа давлат музей-қўриқхонаси ҳудудида олиб борилаётган таъмирлаш ишлари давомида ўнлаб йиллар олдин оғзи ёпиб ташланган қудуқ топилгани тўғрисида хабар берилганди.
Изоҳ (0)