Surxondaryo viloyati Bojxona boshqarmasi xodimlari “Ayritom” chegara-bojxona postida giyohvandlik vositalarini noqonuniy ravishda olib kirish uchun o‘z hayotini xavfga qo‘ygan shaxsni to‘xtatib qoldi, deya xabar bermoqda Davlat bojxona qo‘mitasi axborot xizmati.
Foto: Davlat bojxona qo‘mitasi
Qayd etilishicha, postga piyoda ravishda kirib kelgan qo‘shni davlat fuqarosi M.A. inson tana a’zolarini skanerlash qurilmasi ko‘magida ko‘zdan kechirilganida, uning organizmida yot jismlar — kapsulalar mavjudligi aniqlandi.
Shundan so‘ng Termiz shahridagi tibbiy muassasalardan birida shifokorlar ko‘magida ushbu shaxsning ichidan 47 dona skotchlangan o‘ram chiqarib olindi.
Mazkur o‘ramlar belgilangan tartibda ochib ko‘rilganida esa ularning ichiga 423,42 gramm og‘irlikdagi opiy hamda 17 dona oq rangli tabletka joylangani ma’lum bo‘ldi.
Mazkur holat yuzasidan tergovga qadar tekshiruv harakatlari olib borilmoqda.
Bundan avval Toshkentda poyezd g‘ildiraklari orasiga psixotrop dori vositalari yashirilgani aniqlangani, Surxondaryodan Buxoroga ko‘p miqdorda qoradori olib kirishga uringan fuqaro 4 yil 6 oy muddatga qamalgani hamda O‘zbekistonda 2021-yil boshidan qancha giyohvandlik vositalarining noqonuniy aylanmasiga chek qo‘yilgani ma’lum qilingani haqida xabar berilgandi.
