Сурхондарё вилоятида радарларнинг йўналишини ўзгартириб қўйган ҳайдовчилар аниқланиб, уларга нисбатан чора кўрилди, дея хабар қилмоқда ЙҲХББ.

Қайд этилишича, Термиз—Ангор йўналишида ҳайдовчилар томонидан бир неча марта ана шундай қоидабузарлик содир этилган.

«Йўлда кета-кетгунча Деновдан ўтганда радар турган экан. Радардан озроқ ўтиб тўхтадим-да, машинадан тушиб, радарнинг ёнига келиб, радарни озгина бураб қўйгандим. Кейин радар қўйган ходим машинада келиб, озроқ сиққан эди, орқага ҳайдайман деб чуқурга тушиб кетдим. Машинанинг олди кўтарилиб қолди», — дейди ҳайдовчилардан бири.

Таъкидланишича, ҳайдовчиларга 10 сутка маъмурий қамоқ жазоси тайинланган, автомашиналар жарима майдончасига қўйилган, радарлар эса ўз жойига ўрнатилган.

Қўшимча қилинишича, айни вақтда вилоятда 10 та тезликни ўлчаш мосламаси мавжуд бўлиб, уларнинг 9 таси кўчма радардан иборат.

Бундан аввал Чинозда Damas ЙПХ инспекторининг радар ўрнатилган Nexia’сига бориб урилгани, Тошкентда қоидабузарликни қайд этувчи радарга тош отган йигитлар ушлангани ҳамда Ўзбекистонда тадбиркорлар томонидан қоидабузарликларни аниқлаш учун камералар ўрнатиш тартиби белгилангани ҳақида хабар берилганди.