Surxondaryo viloyatida radarlarning yo‘nalishini o‘zgartirib qo‘ygan haydovchilar aniqlanib, ularga nisbatan chora ko‘rildi, deya xabar qilmoqda YHXBB.
Qayd etilishicha, Termiz—Angor yo‘nalishida haydovchilar tomonidan bir necha marta ana shunday qoidabuzarlik sodir etilgan.
“Yo‘lda keta-ketguncha Denovdan o‘tganda radar turgan ekan. Radardan ozroq o‘tib to‘xtadim-da, mashinadan tushib, radarning yoniga kelib, radarni ozgina burab qo‘ygandim. Keyin radar qo‘ygan xodim mashinada kelib, ozroq siqqan edi, orqaga haydayman deb chuqurga tushib ketdim. Mashinaning oldi ko‘tarilib qoldi”, — deydi haydovchilardan biri.
Ta’kidlanishicha, haydovchilarga 10 sutka ma’muriy qamoq jazosi tayinlangan, avtomashinalar jarima maydonchasiga qo‘yilgan, radarlar esa o‘z joyiga o‘rnatilgan.
Qo‘shimcha qilinishicha, ayni vaqtda viloyatda 10 ta tezlikni o‘lchash moslamasi mavjud bo‘lib, ularning 9 tasi ko‘chma radardan iborat.
Bundan avval Chinozda Damas YPX inspektorining radar o‘rnatilgan Nexia’siga borib urilgani, Toshkentda qoidabuzarlikni qayd etuvchi radarga tosh otgan yigitlar ushlangani hamda O‘zbekistonda tadbirkorlar tomonidan qoidabuzarliklarni aniqlash uchun kameralar o‘rnatish tartibi belgilangani haqida xabar berilgandi.
Izoh (0)