БАА Про-Лигаси. Жалолиддин Машарипов ўйнамаган учрашувда «Шабоб ал-Аҳли» ғалаба қозонди. «Шаржа» ва «Ҳатта»да мағлубият

Футбол бўйича БАА Про-Лигасининг 26-туридан ўрин олган бир қатор ўйинлар 11 май, сешанба куни бўлиб ўтди.

«Шабоб ал-Аҳли» меҳмонда «Ан-Наср» устидан 3:2 ҳисобида ғалаба қозонди. «Шабоб» сафида тўп сурадиган ўзбекистонлик ярим ҳимоячи Жалолиддин Машарипов мазкур баҳсда ўйин қайдномасига киритилмади. Одилжон Ҳамробеков эса 62-дақиқада захирадан майдонга туширилди.

Достонбек Ҳамдамов ҳаракат қиладиган «Ҳатта» сафарда «Ал-Айн»га 1:0 ҳисобида имкониятни бой бериб қўйди. Ҳамдамов 52-дақиқада ўйинга қўшилди.

«Шаржа» «Иттиҳод Калба» билан куч синашиб, минимал ҳисобдаги мағлубиятни қабул қилиб олди. Шаржаликлар сафида тўп тепадиган Отабек Шукуров беллашувда тўлиқ 90 дақиқа ҳаракат қилди.

Ушбу ғалабадан кейин «Шабоб ал-Аҳли»нинг очколари сони 50 тага етди, жамоа мавсумни 3-поғонада якунлади. «Шаржа» (48) 4-ўриндан жой олган бўлса, ҳисобида 12 очко бўлган «Ҳатта» сўнгги ўринни банд этди.