Навоий вилояти Навбаҳор туманида ўқитувчи калтакланди, дея хабар бермоқда «Халқ сўзи Online».
Қайд этилишича, 2021 йилнинг 5 май куни Навбаҳор тумани халқ таълими бўлими тасарруфидаги 33-умумий ўрта таълим мактабида директор йиғилиш ўтказаётган вақтда ушбу мактабнинг 10-синф ўқувчиси Х.М.нинг онаси Навбаҳор тумани «Пахтакор» кўчасида яшовчи фуқаро А.Х. директор йиғилишига рухсатсиз кириб, маънавий-маърифий ишлар бўйича директор ўринбосари Қ.Д.га нисбатан кескин ҳаракатлар қилиб, сочидан тортиб, таълим муассасаси залида (фоесида) уни урган.
А.Х. таълим муассасаси педагог ходимларининг аралашувига қарамасдан Қ.Д.га нисбатан тан жароҳати етказган.
Натижада Қ.Д.га тез тиббий ёрдам кўрсатилиб, туман марказидаги шифохонага жойлаштирилган.
Таълим муассасасида содир этилган мазкур ҳолат туман халқ таълими бўлими ҳамда вилоят Халқ таълими бошқармаси томонидан ўрганилганда, маънавий-маърифий ишлар бўйича директор ўринбосари Қ.Д. фуқаро А.Х.га нисбатан ҳеч қандай қалтис ҳаракат содир этмаганлиги, А.Х.нинг фарзанди 33-умумий ўрта таълим мактаби 10-синф ўқувчиси Х.М.нинг мактаб формасида келиши юзасидан огоҳлантирилганлиги фуқаро А.Х. томонидан ушбу ҳаракатларни содир этишга сабаб бўлганлиги аниқланди.
Вилоят Халқ таълими бошқармаси бошлиғи М.Шомуродов Навбаҳор туман тиббиёт бирлашмасига бориб, жабрланувчи Қ.Д. билан учрашди ва масалага ойдинлик киритиш учун шахсан суҳбатлашди.
Суҳбат асносида ҳолатдан хабардор бўлгач, 33-мактабга бориб, педагогик жамоа билан учрашув ўтказди. Ўқитувчилар ҳамда техник ходимлар билан бўлган суҳбатда Қ.Д. томонидан ўқувчига нисбатан ҳеч қандай босим, шаънига тегувчи ҳаракатлар содир этилмагани аниқланди.
Шундан сўнг бошқарма бошлиғи ҳуқуқни муҳофаза қилувчи органларга мурожаат этиб, масалани узил-кесил адолат нуқтайи назаридан кўриб чиқиш, айбдор шахсни қонунчиликка мувофиқ жавобгарликка тортиш шартлигини билдирди.
Бундан аввал Чироқчида эркак ҳокимлик биноси олдида қизни калтаклагани сабаби маълум бўлгани, Тошкентда 92 ёшли аёл қизи ва невараси томонидан калтаклангани ҳамда Қашқадарёда ўқувчига танбеҳ берган ҳомиладор ўқитувчи калтаклангани ҳақида хабар берилганди.
Изоҳ (0)