Navoiy viloyati Navbahor tumanida o‘qituvchi kaltaklandi, deya xabar bermoqda “Xalq so‘zi Online”.
Qayd etilishicha, 2021-yilning 5-may kuni Navbahor tumani xalq ta’limi bo‘limi tasarrufidagi 33-umumiy o‘rta ta’lim maktabida direktor yig‘ilish o‘tkazayotgan vaqtda ushbu maktabning 10-sinf o‘quvchisi X.M.ning onasi Navbahor tumani “Paxtakor” ko‘chasida yashovchi fuqaro A.X. direktor yig‘ilishiga ruxsatsiz kirib, ma’naviy-ma’rifiy ishlar bo‘yicha direktor o‘rinbosari Q.D.ga nisbatan keskin harakatlar qilib, sochidan tortib, ta’lim muassasasi zalida (foyesida) uni urgan.
A.X. ta’lim muassasasi pedagog xodimlarining aralashuviga qaramasdan Q.D.ga nisbatan tan jarohati yetkazgan.
Natijada Q.D.ga tez tibbiy yordam ko‘rsatilib, tuman markazidagi shifoxonaga joylashtirilgan.
Ta’lim muassasasida sodir etilgan mazkur holat tuman xalq ta’limi bo‘limi hamda viloyat Xalq ta’limi boshqarmasi tomonidan o‘rganilganda, ma’naviy-ma’rifiy ishlar bo‘yicha direktor o‘rinbosari Q.D. fuqaro A.X.ga nisbatan hech qanday qaltis harakat sodir etmaganligi, A.X.ning farzandi 33-umumiy o‘rta ta’lim maktabi 10-sinf o‘quvchisi X.M.ning maktab formasida kelishi yuzasidan ogohlantirilganligi fuqaro A.X. tomonidan ushbu harakatlarni sodir etishga sabab bo‘lganligi aniqlandi.
Viloyat Xalq ta’limi boshqarmasi boshlig‘i M.Shomurodov Navbahor tuman tibbiyot birlashmasiga borib, jabrlanuvchi Q.D. bilan uchrashdi va masalaga oydinlik kiritish uchun shaxsan suhbatlashdi.
Suhbat asnosida holatdan xabardor bo‘lgach, 33-maktabga borib, pedagogik jamoa bilan uchrashuv o‘tkazdi. O‘qituvchilar hamda texnik xodimlar bilan bo‘lgan suhbatda Q.D. tomonidan o‘quvchiga nisbatan hech qanday bosim, sha’niga teguvchi harakatlar sodir etilmagani aniqlandi.
Shundan so‘ng boshqarma boshlig‘i huquqni muhofaza qiluvchi organlarga murojaat etib, masalani uzil-kesil adolat nuqtayi nazaridan ko‘rib chiqish, aybdor shaxsni qonunchilikka muvofiq javobgarlikka tortish shartligini bildirdi.
Bundan avval Chiroqchida erkak hokimlik binosi oldida qizni kaltaklagani sababi ma’lum bo‘lgani, Toshkentda 92 yoshli ayol qizi va nevarasi tomonidan kaltaklangani hamda Qashqadaryoda o‘quvchiga tanbeh bergan homilador o‘qituvchi kaltaklangani haqida xabar berilgandi.
Izoh (0)