АҚШ президенти Жо Байден Россиянинг Украина билан чегарадаги охирги пайтдаги ҳаракатлари унинг яқин орада мамлакат президенти Владимир Путин билан учрашиш истагига таъсир қилмаслигини таъкидлади. Аввалроқ Вашингтон Москвани жанубий чегараларда ҳарбий қўшинларини кучайтиришда ва Донбассдаги вазиятни кескинлаштиришда айблаган эди. Бу ҳақда «Коммерсантъ» хабар берди.
Фото: Reuters
«Бу ҳолат Владимир Путин билан юма-юз кўришишимга таъсир ўтказмайди. Гувоҳи бўляпмизки, аввал чегарадаги ҳарбийлар сони кўпроқ эди ва улар ҳозир чегарадан олинмоқда... ўтган ойга таққослаганда, уларнинг сони сезиларли даражада камайган», — деди Байден матбуот анжуманида. АҚШнинг ҳисоб-китобларига кўра, апрель ойининг ўрталарида Украина чегарасига ва Қримга Россиянинг 100 мингдан ортиқ ҳарбий хизматчилари жойлаштирилди.
Оқ уй раҳбарининг сўзларига кўра, Россия президенти билан учрашув жойи ва санаси номаълумлигича қолмоқда. «Ҳозирча учрашув вақти ва жойи ҳақида аниқ тўхтамга келганимизча йўқ, бунинг устида ишлаяпмиз», — деб қўшимча қилди у. Журналистларнинг учрашув июнь ойида ўтказилиш-ўтказилмаслиги тўғрисидаги саволларига, «Ишончим комилки, бунинг уддасидан чиқа оламиз», деб жавоб берди.
Жо Байден телефон орқали бўлган мулоқотда россиялик ҳамкасбига апрель ойининг ўртасида кўришишни таклиф қилган эди. Учрашувнинг аниқ санаси маълум қилинмаган. Оқ уй маъмурияти учрашувни учинчи мамлакатда ўтказиш таклиф қилган. Австрия ҳукумати учрашувга мезбонлик қилишга тайёр эканини билдирган. Кремль учрашувга расмий жавоб йўқлигини ва Москва бу таклифни ўрганаётганини маълум қилди.
«Коммерсантъ»нинг хабар беришича, Оқ уй раҳбари Россия давлат етакчисини 15—16 июнь кунлари Европа мамлакатларидан бирида учрашишга таклиф қилган. Politico нашрининг маълум қилишича, учрашув Рейкявик, Прага, Любляна ёки Бокуда ўтказилиши мумкин.
Маълумот учун, Июнь ойининг биринчи ярмида Америка президенти давлат раҳбари сифатида чет элга биринчи сафарини режалаштирмоқда. Аввал у Буюк Британияга, кейин Бельгияга боради.
АҚШ давлат котиби Энтони Блинкен Путин ва Байденнинг юзма-юз учрашуви иккала мамлакат учун ҳам фойдали бўлишини айтди.Унинг сўзларига кўра, Байден ҳақиқатан ҳам «ростгўйлик ва очиқликни муҳим», деб ҳисоблайди ва бу учун энг яхши қадамлардан бири — шахсан учрашишдир.
