Бугун медиа-ҳафталик доирасида, Алишер Навоий номидаги кино саройида Кинематография агентлиги ва Самарқанд вилояти ҳокимлиги билан ҳамкорликда суратга олинган «Матонат» ҳужжатли фильмининг премьераси ўтказилди. Ундан кейин «Мерос» тарихий драмасининг катта премьераси тақдим этилди. Ушбу фильм Иккинчи жаҳон уруши давридаги ўзбек ва қозоқ ёшларининг муҳаббати ҳақида ҳикоя қилади.
Шу билан бирга агентлик буюртмасига биноан режиссёр Али Ҳамроев раҳбарлиги остида, 4 нафар ёш киноижодкорлар томонидан суратга олинган «Унутилмас қаҳрамонлар» туркум ҳужжатли фильмларининг ҳам премьераси ўтказилди. Ушбу туркумдан Зебо Ғаниева, Қудрат Суюнов, Иноят Наврўзбоев, Мамадали Топиволдиев каби ўзбекистонлик уруш қаҳрамонлари ҳақидаги ҳужжатли фильмлар ўрин олган.
«Матонат» ҳужжатли киноасари ва «Унутилмас қаҳрамонлар» туркум ҳужжатли фильмлари Ўзбекистон телеканалларига тақдим этилади. Ўзбекистон аҳолиси ушбу фильмларни 9 май арафасида телеэкран орқали ҳам томоша қилиш имкониятига эга бўлади.
Шунингдек, чет эл кино фондларида рақамлаштирилиб, Ўзбекистонга қайтарилган «Сен етим эмассан», «Жарроҳ», «Генерал Раҳимов», «1941 йил олмалари», «Унутилмаган қўшиқ» каби дурдона асарларнинг айримлари илк бора тўлиқ ва асл ҳолатда телевидение орқали намойиш этилиши ҳам режалаштирилган.
Медиа-ҳафталик доирасида яна кўплаб намойиш ва маърифий дастурлар бўлиб ўтиши белгиланган. Ушбу фильмлар намойиши байрам арафасида юртдошларга муносиб туҳфа бўлиши кутилмоқда.
Кинематография агентлиги матбуот хизмати
Реклама ҳуқуқи асосида.
Изоҳ (0)