Bugun media-haftalik doirasida, Alisher Navoiy nomidagi kino saroyida Kinematografiya agentligi va Samarqand viloyati hokimligi bilan hamkorlikda suratga olingan “Matonat” hujjatli filmining premyerasi o‘tkazildi. Undan keyin “Meros” tarixiy dramasining katta premyerasi taqdim etildi. Ushbu film Ikkinchi jahon urushi davridagi o‘zbek va qozoq yoshlarining muhabbati haqida hikoya qiladi.
Shu bilan birga agentlik buyurtmasiga binoan rejissor Ali Hamroyev rahbarligi ostida, 4 nafar yosh kinoijodkorlar tomonidan suratga olingan “Unutilmas qahramonlar” turkum hujjatli filmlarining ham premyerasi o‘tkazildi. Ushbu turkumdan Zebo G‘aniyeva, Qudrat Suyunov, Inoyat Navro‘zboyev, Mamadali Topivoldiyev kabi o‘zbekistonlik urush qahramonlari haqidagi hujjatli filmlar o‘rin olgan.
“Matonat” hujjatli kinoasari va “Unutilmas qahramonlar” turkum hujjatli filmlari O‘zbekiston telekanallariga taqdim etiladi. O‘zbekiston aholisi ushbu filmlarni 9-may arafasida teleekran orqali ham tomosha qilish imkoniyatiga ega bo‘ladi.
Shuningdek, chet el kino fondlarida raqamlashtirilib, O‘zbekistonga qaytarilgan “Sen yetim emassan”, “Jarroh”, “General Rahimov”, “1941-yil olmalari”, “Unutilmagan qo‘shiq” kabi durdona asarlarning ayrimlari ilk bora to‘liq va asl holatda televideniye orqali namoyish etilishi ham rejalashtirilgan.
Media-haftalik doirasida yana ko‘plab namoyish va ma’rifiy dasturlar bo‘lib o‘tishi belgilangan. Ushbu filmlar namoyishi bayram arafasida yurtdoshlarga munosib tuhfa bo‘lishi kutilmoqda.
Kinematografiya agentligi matbuot xizmati
Reklama huquqi asosida.
Izoh (0)