Ўзбекистонда 9 май кунига бағишланган тадбирлар карантин қоидаларига қатъий риоя этилган ҳолда ўтказиш назорат қилинади. Бу ҳақда Республика махсус комиссияси ахборот берди.
«Мамлакатимизда коронавирус инфекциясини юқтириш бўйича кунлик кўрсаткич апрель ойининг иккинчи ярмидан бошлаб 300 дан ошган бўлса, ушбу кўрсаткич 2021 йил 6 май ҳолатига 450 дан ошгани ҳам фуқароларимиз томонидан карантин чекловларига амал қилиш масъулиятини янада оширишни тақозо этмоқда.
Шу муносабат билан аҳоли саломатлигини сақлаш, мамлакатда эпидемиологик вазият кескинлашувига йўл қўймаслик мақсадида юртимизда 9 май — Хотира ва қадрлаш байрами билан боғлиқ оммавий тадбирларни фақатгина Ўзбекистон Президентининг 2021 йил 20 апрелдаги ПҚ–5081-сон қарори билан тасдиқланган 9 май — Хотира ва қадрлаш куни, умумхалқ байрамига бағишланган тадбирларга тайёргарлик кўриш ва уларни ўтказиш дастури доирасида карантин талабларига қатъий риоя этган ҳолда амалга ошириш зарур», – дейилади комиссия ахборотида.
Шунингдек, юқоридаги дастурда назарда тутилмаган бошқа ҳар қандай оммавий тадбирларни ўтказиш тақиқланади. Ушбу карантин чекловига риоя этилиши Қорақалпоғистон Вазирлар Кенгаши ва маҳаллий ҳокимликлар, Миллий гвардия, ички ишлар органлари ва бошқа мутасадди ташкилотлар томонидан назорат қилинади.
Бундан аввал Шавкат Мирзиёев 9 май – Хотира ва қадрлаш кунига тайёргарлик кўриш бўйича қарорни имзолагани, Ўзбекистонда Иккинчи жаҳон уруши қатнашчилари ва ногиронларига 12 млн сўм миқдорида бир марталик пул мукофоти берилиши, Иккинчи жаҳон уруши вақтида бедарак йўқолган ўзбек аскарининг хоки ватанга олиб келингани ҳамда Тошкентда «Бессмертний полк» акциясини ўтказишга рухсат берилгани ҳақидаги хабарлар расман рад этилгани ҳақида хабар берилганди.
Изоҳ (0)