Бразилия коронавируснинг «идеал лабораторияси» деб аталди. Мамлакатда янги ва хавфлироқ штаммлар пайдо бўлмоқда

Мутахассислар Бразилияда коронавируснинг янги ва хавфлироқ штаммлари пайдо бўлганини маълум қилди, деб ёзади «РБК».

Бразилиядаги Сан-Паулу университети тиббиёт факультети профессори Доминго Алвес мамлакат коронавируснинг янги штаммлари пайдо бўлиши учун идеал лабораторияга айланганини айтди.

Унинг айтишича, COVID-19 билан касалланиш даражасининг юқорилигидан ташқари, мамлакатда тегишли санитария назорати мавжуд эмас. «Янги штаммларнинг ҳозирча маълум бўлган рўйхати — бу айсбергнинг учи холос, сув остида яна кўп нарсалар бўлиши керак», — деб огоҳлантирди Алвес.

Мутахассис Манаус шаҳрида аниқланган «амазонча» штамм (P.1) хавфини алоҳида таъкидлади. Штамм кашф этилгандан сўнг унинг хавф гуруҳига тобора кўпроқ ёшлар ва ҳомиладор аёллар кира бошлади.

Профессор мутациялар пайдо бўлишининг яна бир омили аҳолини эмлаш эканини айтди. Унга кўра, вирус эмланган одамлар танасига тушганда «антитана қалқони»ни бузадиган штаммлар пайдо бўлиши мумкин.

Олдинроқ The Financial Times газетаси Оксфорд, Сан-Паулу ва Лондон Империал коллежи университетлари томонидан ўтказилган қўшма тадқиқотга асосланиб, «амазонча» штаммнинг (P.1) зўрайиши илгари COVID-19 билан касалланган одамларда ҳосил бўлган иммунитетни енгиб ўтишга қодир, деб ёзган эди.

Тадқиқот муаллифлари P.1 штамм коронавируснинг бошқа вариантларига қараганда 1,4-2,2 баробар кўпроқ юқишини таъкидлаган.

Тадқиқотчилар, шунингдек, Манаусда «амазонча» штамм пайдо бўлганидан сўнг вирусдан ўлиш эҳтимоли аввалгига нисбатан 10-80 фоизга ортганини аниқлади. Бироқ улар бу янги штаммнинг ўлимга олиб келиши билан эмас, балки шаҳар соғлиқни сақлаш тизимига тушган босимнинг кучайиши билан боғлиқлигини қайд этди. Тадқиқот шуни кўрсатдики, «амазонча» штамм генетик кетма-кетлиги ўзгарган 17 дан ортиқ мутацияга эга.

Март ойида Франция ҳукумати Бразилияда коронавируснинг «бразилияча» штамми кенг тарқалаётгани сабабли ушбу мамлакат билан парвозларни номаълум муддатга тўхтатишга қарор қилган эди.

Аввалроқ Бразилияда пандемия даврида соғлиқни сақлаш вазири тўртинчи марта ўзгаргани, мамлакатда коронавирусга қарши эмлаш вакцина танқислиги сабаб тўхтатилгани ҳақида хабар берилган.