Braziliya koronavirusning “ideal laboratoriyasi” deb ataldi. Mamlakatda yangi va xavfliroq shtammlar paydo bo‘lmoqda

Mutaxassislar Braziliyada koronavirusning yangi va xavfliroq shtammlari paydo bo‘lganini ma’lum qildi, deb yozadi “RBK”.

Braziliyadagi San-Paulu universiteti tibbiyot fakulteti professori Domingo Alves mamlakat koronavirusning yangi shtammlari paydo bo‘lishi uchun ideal laboratoriyaga aylanganini aytdi.

Uning aytishicha, COVID-19 bilan kasallanish darajasining yuqoriligidan tashqari, mamlakatda tegishli sanitariya nazorati mavjud emas. “Yangi shtammlarning hozircha ma’lum bo‘lgan ro‘yxati — bu aysbergning uchi xolos, suv ostida yana ko‘p narsalar bo‘lishi kerak”, — deb ogohlantirdi Alves.

Mutaxassis Manaus shahrida aniqlangan “amazoncha” shtamm (P.1) xavfini alohida ta’kidladi. Shtamm kashf etilgandan so‘ng uning xavf guruhiga tobora ko‘proq yoshlar va homilador ayollar kira boshladi.

Professor mutatsiyalar paydo bo‘lishining yana bir omili aholini emlash ekanini aytdi. Unga ko‘ra, virus emlangan odamlar tanasiga tushganda “antitana qalqoni”ni buzadigan shtammlar paydo bo‘lishi mumkin.

Oldinroq The Financial Times gazetasi Oksford, San-Paulu va London Imperial kolleji universitetlari tomonidan o‘tkazilgan qo‘shma tadqiqotga asoslanib, “amazoncha” shtammning (P.1) zo‘rayishi ilgari COVID-19 bilan kasallangan odamlarda hosil bo‘lgan immunitetni yengib o‘tishga qodir, deb yozgan edi.

Tadqiqot mualliflari P.1 shtamm koronavirusning boshqa variantlariga qaraganda 1,4-2,2 barobar ko‘proq yuqishini ta’kidlagan.

Tadqiqotchilar, shuningdek, Manausda “amazoncha” shtamm paydo bo‘lganidan so‘ng virusdan o‘lish ehtimoli avvalgiga nisbatan 10-80 foizga ortganini aniqladi. Biroq ular bu yangi shtammning o‘limga olib kelishi bilan emas, balki shahar sog‘liqni saqlash tizimiga tushgan bosimning kuchayishi bilan bog‘liqligini qayd etdi. Tadqiqot shuni ko‘rsatdiki, “amazoncha” shtamm genetik ketma-ketligi o‘zgargan 17 dan ortiq mutatsiyaga ega.

Mart oyida Fransiya hukumati Braziliyada koronavirusning “braziliyacha” shtammi keng tarqalayotgani sababli ushbu mamlakat bilan parvozlarni noma’lum muddatga to‘xtatishga qaror qilgan edi.

Avvalroq Braziliyada pandemiya davrida sog‘liqni saqlash vaziri to‘rtinchi marta o‘zgargani, mamlakatda koronavirusga qarshi emlash vaksina tanqisligi sabab to‘xtatilgani haqida xabar berilgan.