Volkswagen компанияси 1 апрелда ўз номини Voltswagen’га ўзгартиргани ҳақида ҳазил қилганди. Энди эса автомобиль ишлаб чиқарувчи бунинг орқасидан жиддий кўнгилсизликларга дуч келиши мумкин. АҚШ Қимматли қоғозлар комиссияси тергов бошлади: мутахассислар компаниянинг ҳазили унинг акциялари қийматига таъсир кўрсатган ёки кўрсатмаганини аниқлаши лозим. Volkswagen қимматли қоғозлар котировкасида манипуляцияни амалга оширгани сабаб жаримага тортилиши мумкин, деб хабар беради Motor.
Тергов ишларига оид маълумотлар йўқ. Der Spiegel’нинг маълум қилишича, Volkswagen’нинг марка номини ўзгартириш борасида «қовун туширган» Америкадаги ваколатхонаси маълумотларни Қимматли қоғозлар комиссиясига топшириш ва терговга ёрдам кўрсатиш бўйича сўровни олган.
Volkswagen компанияси АҚШда ўз номини Voltswagen’га ўзгартираётгани тўғрисида хабар 2021 йилнинг 1 апрель куни хориж ОАВларида кенг тарқалди. Кўпчилик бу каби юришга ишонмай, буни 1 апрель ҳазили деб атаган. Бироқ 30 март куни Volkswagen of America сайтида ростдан ҳам компания ребрендингга тайёрлиги тўғрисида маълумот пайдо бўлган: худдики марканинг электрокарлари Америка бозорида Voltswagen маркаси остида сотилади.
Релиз эълон қилинганидан бир сутка ўтгач, бу ИД.4 электрокари учун эътиборни жалб этишга қаратилган маркетинг юриши эканлиги маълум бўлди. Автомобиль ишлаб чиқарувчи «ортиб тушганини»тан олиб, кечирим сўраган.
Омадсиз ҳазил Volkswagen имиджига таъсир кўрсатган ва жамоатчиликнинг немис автомобиль ишлаб чиқарувчига бўлган ишончига путур етказгани айтилмоқда.
Мавзуга доир: Volkswagen Nokia компанияси тақдиридан қочмоқчи
Изоҳ (0)