АҚШ президенти Жо Байден администрацияси Эронга қарши жорий қилинган кескин санкцияларнинг маълум қисмини бекор қилиши мумкин. Бу ҳақда Associated Press хабар берган.
Санкцияларни бекор қилиш Эроннинг Ядро дастури бўйича халқаро келишув режасининг шартларига қайтишини таъминлаши кутилмоқда. АҚШ амалдорлари AP агентлигига айнан қайси чекловларнинг бекор қилиниши бўйича тафсилотларни ошкор этмаган. Лекин улар Теҳрон келишув шартларига риоя қилишни бошлайдиган бўлса, Вашингтоннинг ядро келишувига алоқадор ҳар қандай санкцияларни олиб ташлаши ва бу борада Эронни ёрдамдан қуруқ қолдириши мумкин бўлган тўсиқларни ечишини қайд этган, деб ёзмоқда AP.
Давлат департаменти вакили Нед Прайс Эроннинг ядро келишуви шартларига қайтиши санкцияларнинг ечилишига асос бўлиши, бироқ Вашингтон айнан келишув шартларига алоқадор санкцияларни бекор қилмоқчи эканлигини айтиб ўтган. Шунингдек, у Эрон мазкур халқаро келишувга қайтган тақдирда ҳам, АҚШнинг Теҳронга нисбатан террорчилик, ракеталарни тарқатиш ва инсон ҳуқуқларининг поймол қилиниши билан боғлиқ санкцияларни олиб ташламаслигини қўшимча қилган.
Апрель ойи охирида Венада Ядро келишуви бўйича Қўшма комиссия музокараларининг навбатдаги раунди бошланди. Учрашув иштирокчилари мазкур халқаро келишув талабларига тўлиқ риоя этишни бошлаш масалаларини муҳокама қилган.
«Биргаликдаги ҳаракатлар режаси» деб номланадиган келишув 2015 йил ёзида Теҳрон ҳамда бешта воситачи мамлакат ўртасида имзоланган. Кейинчалик Эроннинг мазкур келишувни қўпол равишда бузганликда айблашди. 2018 йил май ойи бошида АҚШ келишувдан бир томонлама чиқишини эълон қилди ва Эронга қарши санкциялар қайта жорий қилинганини билдирди. Эрон эса келишув шартларига ортиқ риоя қилмаслиги ва 2020 йил январдан мазкур шартномадан тўлиқ чиққанини қайд этди.
Изоҳ (0)