AQSh prezidenti Jo Bayden administratsiyasi Eronga qarshi joriy qilingan keskin sanksiyalarning ma’lum qismini bekor qilishi mumkin. Bu haqda Associated Press xabar bergan.
Sanksiyalarni bekor qilish Eronning Yadro dasturi bo‘yicha xalqaro kelishuv rejasining shartlariga qaytishini ta’minlashi kutilmoqda. AQSh amaldorlari AP agentligiga aynan qaysi cheklovlarning bekor qilinishi bo‘yicha tafsilotlarni oshkor etmagan. Lekin ular Tehron kelishuv shartlariga rioya qilishni boshlaydigan bo‘lsa, Vashingtonning yadro kelishuviga aloqador har qanday sanksiyalarni olib tashlashi va bu borada Eronni yordamdan quruq qoldirishi mumkin bo‘lgan to‘siqlarni yechishini qayd etgan, deb yozmoqda AP.
Davlat departamenti vakili Ned Prays Eronning yadro kelishuvi shartlariga qaytishi sanksiyalarning yechilishiga asos bo‘lishi, biroq Vashington aynan kelishuv shartlariga aloqador sanksiyalarni bekor qilmoqchi ekanligini aytib o‘tgan. Shuningdek, u Eron mazkur xalqaro kelishuvga qaytgan taqdirda ham, AQShning Tehronga nisbatan terrorchilik, raketalarni tarqatish va inson huquqlarining poymol qilinishi bilan bog‘liq sanksiyalarni olib tashlamasligini qo‘shimcha qilgan.
Aprel oyi oxirida Venada Yadro kelishuvi bo‘yicha Qo‘shma komissiya muzokaralarining navbatdagi raundi boshlandi. Uchrashuv ishtirokchilari mazkur xalqaro kelishuv talablariga to‘liq rioya etishni boshlash masalalarini muhokama qilgan.
“Birgalikdagi harakatlar rejasi” deb nomlanadigan kelishuv 2015-yil yozida Tehron hamda beshta vositachi mamlakat o‘rtasida imzolangan. Keyinchalik Eronning mazkur kelishuvni qo‘pol ravishda buzganlikda ayblashdi. 2018-yil may oyi boshida AQSh kelishuvdan bir tomonlama chiqishini e’lon qildi va Eronga qarshi sanksiyalar qayta joriy qilinganini bildirdi. Eron esa kelishuv shartlariga ortiq rioya qilmasligi va 2020-yil yanvardan mazkur shartnomadan to‘liq chiqqanini qayd etdi.
Izoh (0)