Қирғизистон президенти Садир Жапаров 26 апрель куни «AКИpress» агентлигига берган интервьюсида Кампиробод сув омборининг Ўзбекистонга берилишига қарши намойишлар бўйича изоҳ берди. Бу ҳақда «Gazeta.uz» хабар бермоқда.
Масала тарихи
Икки давлат ўртасида март ойида эришилган келишувларга мувофиқ, бир қатор чегараолди участкалари, хусусан, Унгар-Тоо тоғи Қирғизистонга ўтади. Ушбу ҳудудлар эвазига Ўзбекистон Кампиробод сув омборидан фойдаланиш ҳуқуқини қўлга киритган. Шаҳрихонсой канали жойлашган 50 гектарлик майдон ҳам Ўзбекистонга ўтган. Қирғизистон бунинг эвазига Ўзган туманининг чегараолди қисмидан 50 гектар ер олган.Ўзбекистон нашрлари бу ҳақда Қирғизистон оммавий ахборот воситалари ва қўшни мамлакатнинг Миллий хавфсизлик давлат қўмитаси раиси Қамчибек Ташиевга таяниб хабар берган. Ўзбекистон томони Қирғизистон билан эришилган келишувлар ҳақида батафсил маълумот бермаган.
Қирғизистоннинг Қорасув тумани Савай қишлоғи аҳолиси 14 апрель куни Кампиробод сув омборининг 50 гектари Ўзбекистонга берилишига қарши муддатсиз норозилик акциясини бошлади. Оқсоқоллар ҳукуматнинг хатти-ҳаракатларидан, ер алмашиш бўйича батафсил ахборот йўқлигидан ва бунда маҳаллий аҳоли фикри инобатга олинмаганидан норозилигини билдирган. Аҳолининг фикрича, бу алмашинув Қирғизистон манфаатларига зарар келтирадиган кўринишда амалга оширилган.
Худди шундай намойишлар 17 апрелдан 19 апрелгача Қорасув туманининг Интимоқ қишлоғи аҳолиси томонидан, 21 апрель куни эса Қизил Октябрь қишлоғи фуқаролари томонидан ҳам ўтказилган.
Намойишчилар билан чегараларни делимитация ва демаркация қилиш бўйича ҳукумат комиссияси раҳбари Қамчибек Ташиев учрашган. У яна музокара ўтказиш учун Тошкентга бориб, 50 гектар ўрнига 20 гектар ер ажратилишига Ўзбекистонни кўндиришга ҳаракат қилишга ваъда берган.
Садир Жапаровнинг муносабати
Қирғизистон президенти Садир Жапаровнинг маълум қилишича, «чегара масаласида икки мамлакат ўртасида, албатта, баҳслар бўлади».«Бу нарса осон ҳал қилинмайди. Масалан, Ўзбекистонда ҳам мунозаралар бўляпти — у ерда ҳам одамлар уларнинг ерлари бериб юборилгани ҳақида гапиряпти, у ерда ҳам норозилик бор. Шу боис, чегара масаласини ҳал қиларкансан, бир жойдан 5 гектар ер бераяпсанми, бошқа жойдан, бошқа қишлоқ ё тумандан 5 гектар олишинг керак», — деди у.
«Ўтган 30 йилда, ўзингиз ҳам биласиз, ҳаммасини яширинча, махфий ҳал қилишган, имзолаб, ратификация қилиб, тасдиқлаб, сўнг тиканли симлар тортилаётганида халқ уларнинг ери бериб юборилганидан норозилигини билдирган. Ерларимиз шунақа берилган. Ҳозир биз ўша ерларни қандайдир қайтариб олиш учун музокара олиб боряпмиз. Шундай музокараларда бир томондан бераётган бўлса, бошқа томондан оляпмиз», — деди у.
Қирғизистон президентининг маълум қилишича, энди масала аҳоли билан, музокаралар йўли билан ҳал қилинади.
«Ҳозир фақат музокараларнинг бошида турибмиз. Ҳеч қандай ҳужжат имзоланмаган. Тўрт босқичдан ўтилганидан кейингина имзоланади. Аввал комиссия протоколни кўриб чиқади, кейин уни президентларга олиб киради, улар кўриб чиқиб, парламентларга юборади, парламент ратификация қилиб, яна президентга қайтаради ва президент имзолаганидан кейингина кучга киради. Биз музокаралар олиб боряпмиз ва буни давом эттирамиз», — деди у.
«Биз аввалгилар йўл қўйган хатоларни такрорламасликка ҳаракат қиляпмиз. Авваллари нафақат маҳаллий аҳоли, балки қирғизистонликлар ҳам билмасди. Фақат тиканли симлар тортилаётганидагина хабар топиларди... Аммо биз давлатимиз ва халқимиз зарарига қарор қабул қилмаймиз. Биз ҳаммаси давлат ва халқ фойдасига ҳал бўлиши учун барча имкониятларни ишга соламиз», — дейди президент.
Садир Жапаров яқин ойларда Қирғизистоннинг жанубий ҳудудлари бўйлаб айланиб, халқ билан учрашмоқчилигини ҳам билдирган.
«Тахминан май охири, июнь—июль ойларида бўш вақтим бўлади, ўшанда жанубни айланиб келаман, халқ билан учрашаман. Биз маҳаллий аҳоли билан маслаҳатлашиб, сўнг қарор қабул қиламиз», — деди у.
Изоҳ (0)