Наманганда 2021 йил биринчи чорагида алимент тўлашдан бўйин товлаган 285 нафар шахсга нисбатан суд қарорлари билан маъмурий қамоқ тарзидаги жазо чораси қўлланган. Бу ҳақда МИБ вилоят бошқармаси томонидан ўтказилган матбуот анжуманида маълум қилинди, дея хабар беради «Дарё» мухбири Азизбек Абдувалиев.
Бу чорадан кейин ҳам алимент тўламагани учун 2 кишига нисбатан жиноят иши қўзғатилган. Алимент тўловидан қарздорлиги бўлган 17 мингдан ортиқ фуқаронинг мамлакат ҳудудидан четга чиқиши вақтинча чекланган.
Матбуот анжуманида таъкидланишича, вилоятда алимент тўловларини ўз вақтида амалга ошираётган, ҳатто олдиндан тўлаб қўяётганлар ҳам бор. Хусусан, 2021 йил биринчи чорагида 172 та алимент билан боғлиқ ижро ҳужжати олдиндан тўлов амалга оширилгани учун иш юритувидан тугатилган.
«Поп туманида истиқомат қилувчи фуқаро Ш.Н.дан собиқ турмуш ўртоғи Н.М. фойдасига бир нафар фарзандининг моддий таъминоти учун алимент ундириш белгиланганди. Унга алиментни ўз вақтида тўлаб бориш зарурлиги тушунтирилган ва огоҳлантирилган. Бироқ у бунга маъсулиятсизлик билан қараб, юзага келган қарздорликни бартараф этмади. Натижада бюронинг Поп туман бўлим давлат ижрочиси томонидан тўпланган ҳужжатлар судга юборилди. Бўлиб ўтган суд жараёнида қарздор отага яна бир имконият берилди. У бундан тўғри хулоса чиқарди ва фарзанди вояга етгунга қадар ҳисобланган салкам 66 миллион сўм ўрнига 6300 АҚШ долларини бир йўла тўлаб берди», — дейди МИБ вилоят бошқармаси матбуот хизмати раҳбари Соҳибжон Рапиқов.
Матбуот анжуманида қайд этилишича, Наманган вилоятида 2021 йил январь—март ойларида жами 7 миллиард 250 миллион сўм алимент ундирилиб, эгаларига етказилган.
Изоҳ (0)