«Ўзавтосаноат» ўтган чорак давомида қарийб 50 млрд сўм фойда кўрди

Автомобиль саноатидаги 40 га яқин корхонани ўзида бирлаштирган «Ўзавтосаноат» 2021 йилнинг I чораги якунларини сарҳисоб қилди, деб хабар беради Spot.

Аниқланишича, компаниянинг асосий фаолиятидан келган даромадлар 47,4 миллиард сўмни ташкил этган. Бу ўтган йилнинг мос даврига нисбатан 19,2 миллиард сўмга кўп демак.

Асосий фаолият туридан келадиган фойда эса янада ошган — 35,6 миллиард сўм (2020 йилнинг мос даврида 14,9 миллиард сўм).

Молиявий фаолиятдан келадиган тушумлар кескин камайган — 31,3 миллиард сўмдан 19,1 миллиард сўмга қадар. Бунга дивидендлар ва фоизлар кўринишидаги даромадларнинг кескин қисқариши сабаб бўлган.

Шунингдек, компания 2021 йилда сарфларни ҳам камайтирган — харажатлар 1,4 миллиард сўмга камайиб, 11,8 миллиард сўмни ташкил этган.

«Ўзавтосаноат»нинг кўрган фойдаси солиқлар тўлангунига қадар 50,8 миллиард сўмни, тўлангач, 42,8 миллиард сўмни ташкил этган. Бу 2020 йилнинг мос даврига нисбатан 8,9 миллиард сўмга кўп демак.

Компаниянинг кўрсаткичлари сўнгги йилларда кескин кўтарилди. Масалан, 2021 йилнинг дастлабки уч ойидаги фойда 2018 йилнинг дастлабки олти ойидаги фойдага яқинлашган.