Коррупцияга қарши курашиш агентлиги Бухоро тиббиёт институти томонидан давлат харидлари борасида қонун бузилишига йўл қўйилганини тасдиқлади
27 март куни «Troll.uz» блогининг муаллифи Умид Ғофуров Бухоро давлат тиббиёт институти «Одам анатомияси. Aтлас» китобининг харидида давлат харидлари тўғрисидаги қонунларни бузган бўлиши мумкинлиги ҳақида видео эълон қилган эди, деб хабар беради «Gazeta.uz».
Роликда таъкидланишича, Бухоро давлат тиббиёт институти китоблар хариди бўйича «Битуби Групп» компанияси билан бир нечта шартномаларни имзолаган бўлиб, уларнинг муаллифи сифатида институт ректори, профессор Шуҳрат Тешаев ҳамда ОТМда меҳнат шартномаси асосида ишлаган Елена Харибова кўрсатилган.
Битимнинг умумий қиймати камида 1,4 миллиард сўмни ташкил этган, шу билан бирга, китоб нархи мунтазам ошган, айрим битимлар эса бошқа муқобил номзодлардан фойдали таклифлар билдирилганига қарамай, «Битуби Групп» нашриёт фаолияти бўйича лицензияни қўлга киритишидан олдин имзоланган.
Бундан ташқари, ректорнинг шахсий автомобили бўлса-да, у ўзининг қариндошларини хизмат машинасида олиб юрган ҳайдовчисини ишдан бўшатгани ҳақида маълумот берилган. Ҳайдовчининг таъкидлашича, хизмат автомобилидан шахсий мақсадларда фойдаланиш сабаб ёқилғи сарфи белгиланган лимитдан ошиб кета бошлаган.
Коррупцияга қарши курашиш агентлигининг муносабати
Коррупцияга қарши курашиш агентлиги Бухоро вилояти прокуратураси билан ҳамкорликда юқоридаги ҳолат бўйича олиб борилган текшириш ишлари натижасини маълум қилди.
Идора маълумотларига кўра, институт «Битуби Групп» билан 721,2 миллион сўмлик жами 1725 та «Одам анатомияси. Aтлас» китобини харид қилиш бўйича битим имзолаган. Ушбу маблағнинг 602,2 миллион сўми шартнома асосида ўқишга қабул қилинган талабаларнинг маблағидан, 119 миллион сўми — бюджет ҳисобидан молиялаштирилган. Китобларнинг барчаси балансга олинган ва уларни санаш вақтида камчилик аниқланмаган.
Агентликнинг қайд этишича, «Битуби Групп» нашриёт фаолияти билан шуғулланиш учун лицензияни олгунига қадар иккита шартнома имзоланган. Давлат харидлари тўғрисидаги қонун ҳужжатларини бузганлиги учун компания билан тузилган иккита тўғридан-тўғри келишув (299,7 миллион сўм ва 419,8 миллион сўм) бекор қилинди.
Lacetti хизмат автомобилнинг 2019—2020 йиллар учун белгиланган лимитдан ошиб кетган 1144 кубометр миқдордаги ортиқча газ сарфи учун институтнинг собиқ раҳбариятидан 8,4 миллион сўм ундириб олинган. 2017—2020 йиллар давомида институт ректори сифатида Амрилло Иноятов фаолият юритган бўлиб, у 2020 йилнинг ноябридан буён соғлиқни сақлаш вазирининг биринчи ўринбосари сифатида ишлаб келмоқда.
Коррупцияга қарши курашиш агентлиги ҳайдовчи Б.Д.нинг ноқонуний равишда ишдан бўшатилганини тасдиқлаган. Вилоят прокуратурасининг аралашувидан сўнг, у ўз лавозимига қайта тикланган.
Шунингдек, ўрганишлар давомида тиббиёт институти Президентнинг 2018 йил 7 ноябрдаги қарори талабларини бузиб, 7,8 миллиард сўмни (пуллик таълимга оид шартномалар бўйича тушумлар орқали тўпланган) ўз вақтида Соғлиқни сақлаш вазирлиги ҳузуридаги Ривожлантириш ва соғлиқни сақлашни бошқариш органлари ходимларини моддий рағбатлантириш жамғармасига ўтказмагани аниқланди.
Мавзуга доир:
