Амалдорлар Бердимуҳаммедовга «Тошкент» истироҳат боғининг қурилиши тўғрисида ҳисобот берди

Туркманистонда 26 апрель куни мамлакат президенти Гурбангули Бердимуҳамедов видеоселектор йиғилишини ўтказди. Бу ҳақда «Хроника Туркменистана» хабар берди.

Ашхобод мери Язтаган Гилижов ва қурилиш-саноат мажмуаси масалалари бўйича бош вазир ўринбосари Шомуҳаммад Дурдилиев Ашхободнинг 140 йиллиги ва мамлакат мустақиллигининг 30 йиллиги байрамлари, шунингдек, ушбу саналарда очилиши керак бўлган объектлар ҳақида ҳисобот берди.

Президент пойтахтда қурилаётган «Тошкент» истироҳат боғининг қурилишига алоҳида эътибор қаратди. Бош вазир ўринбосари лойиҳаларни ишлаб чиқиш бўйича ишлар амалга оширилгани, тендерларнинг бир неча босқичлари ўтказилгани ва ҳозирда «якуний тендерга тайёргарлик кўрилаётгани» ҳақида маълум қилди. Бердимуҳамедов боғнинг мақсади ҳақида унутмасликни айтиб, пойтахт маъмуриятига лойиҳанинг буюртмачиси бўлишни буюрди.

Ҳудудлар раҳбарларининг ҳисоботидан кейин президент ерларни сув билан таъминлаш ва уларни минерал моддалар билан ўғитлаш масалаларини ҳал қилишни, пахта, буғдой, сабзавотлар ва полиз маҳсулотларини парваришлашни, шунингдек, ижтимоий ва ишлаб чиқариш объектларининг ўз вақтида қуриб битказилишини назорат қилишни топширди.

17 февраль куни Гурбангули Бердимуҳамедов Ўзбекситон ташқи ишлар вазири Абдулазиз Комиловни қабул қилиб, Ашхободда «Тошкент» истироҳат боғи очилишини айтган эди.

18 февраль куни «Нейтральний Туркменистан» газетаси Қурилиш ва архитектура вазирлиги Ашхобод ҳокимлигининг буюртмаси билан «Тошкент» истироҳат боғининг қурилиши учун тендер эълон қилгани ва аризаларнинг 5 апрелгача қабул қилиниши ҳақида хабар берди.

17 март куни Тошкент шаҳар ҳокими Жаҳонгир Ортиқхўжаев бошчилигидаги делегация расмий ташриф билан Ашхободга борди ва «Тошкент» истироҳат боғининг дастлабки қурилиш лойиҳаси билан танишди.

Маълумот учун, 18 апрель, якшанба куни Туркманистон президенти Гурбангули Бердимуҳамедовнинг отаси Маликгули Бердимуҳамедов 89 ёшида вафот этди. Шундан буён Бердимуҳамедов биринчи марта омма олдида кўриниш берди.

Қозоғистон президенти Қосим-Жўмарт Тўқаев Туркманистон президенти Гурбангули Бердимуҳамедовга отасининг вафоти муносабати билан ҳамдардлик телеграммасини юборди.