«Автомобиль газ баллони техник кўрикдан ўтказилмаган». Қаршидаги метан заправкада портлаган автомобиль ҳақида қўшимча маълумот берилди

Қашқадарё вилоятининг Қарши туманидаги автомобилларга газ қуйиш шохобчасида Nexia-1’га ўрнатилган газ баллони портлагани ва оқибатда бир киши вафот этгани хабар берилганди. Вилоят ИИБ, ЙҲХБ бошлиғи Аҳмад Соатовнинг айтишича, мазкур машина газ баллони муддати ўтганлиги сабабли портлаган. Бу ҳақда Қарши шаҳридаги Маданият уйида Қашқадарё вилоят ИИБ ЙҲХБ, вилоят Транспорт бошқармаси ҳамкорлигида ўтказилган тадбирда маълум қилинди, дея хабар берди «Дарё» мухбири.

«Эшитгандирсизлар, ота-бола техника хавфсизлигига риоя қилмаган ҳолда Қарши туманидаги газ заправкага бирга киряпти. Ота кассага боряпти, ўғли эса юкхонани очиб-ёпяпти. Ўша пайтда машина портлаб, болани тепага улоқтириб, иккига бўлиб юборяпти. Кўрсангиз, жудаям даҳшат. Болани бўлакларга бўлиб ташлаган», — дейди воқеа ҳақида гапирган Аҳмад Соатов.

ЙПХ инспекторлари бошлиғининг маълумот беришича, газ баллони портлаган машина техник кўрикдан ҳам ўтказилмаган.

«Аввало, газ заправкада машина баллонига 200 дан ортиқ босим уриляпти. Автомобиль газ баллони эса техник кўрикдан ҳам ўтмаган экан. Такси фаолияти билан шуғулланган ҳайдовчи уюшма томонидан техник кўрикка чақирилган. Аммо автомобиль эгаси бормаган. Боиси, газ баллони муддати ўтган бўлган», — деди Аҳмад Соатов.

Аҳмад Соатов ЙПХ инспекторларининг газ баллонини текширишга бўлган уриниши жамоатчилик эътирозига сабаб бўлаётганини эслатиб, бу ҳайдовчилар соғлиғи, уларнинг оиласи тинчлиги учун эканлигини таъкидлаган.

«Интернетда кўряпсизлар, ҳар хил маълумотлар тарқаляпти. Биз сизнинг ва оилангизнинг соғлиғини ўйлаганимиз учун шу ишларни (газ баллонига оид ҳужжатлар текширилиши назарда тутилмоқда. Таҳририят изоҳи) қиляпмиз. Мақсадимиз сизга жарима тўлатиб, давлатни бойитиш эмас. Биз қонун ижросини назорат қиляпмиз», — деди Аҳмад Соатов.

Аҳмад Соатов вилоятда таксилар фаолиятини назорат қилувчи уюшмалар ҳақида ҳам тўхталиб ўтиб, ЙТҲларнинг содир бўлишида такси ҳайдовчиларининг ноқонуний хатти-ҳаракати сабаб бўлаётганини қўшимча қилган.

«Йўловчи ташиш билан шуғулланиб, уйга толиқиб қайтган ота кўчадан келиб, ўғлига калитни беряпти ва бир соат айланиб кел деяпти. Бу аҳир ноқонуний», — деди Аҳмад Соатов.