Хитой ҳукумати Буюк Британиянинг мамлакатдаги Шинжон-Уйғур автоном вилоятида инсон ҳуқуқлари бузилаётгани тўғрисидаги даъволарига жавоб берди, деб ёзади Reuters.
Фото: Reuters
Хабарга кўра, Британия парламенти ҳукуматни халқаро қонунлардан фойдаланишга ва вазирларга Пекинни танқид қилишда давом этиши учун босимни кучайтириш орқали қонунчилар «Шинжон геноциди» деб атаган ҳаракатларга чек қўйишга чақирган. Буюк Британиядаги Хитой элчихонаси парламентнинг бу ҳаракатини қоралаб, Буюк Британияни Хитойнинг асосий манфаатларини ҳурмат қилишга оид аниқ қадамлар ташлашга чақирди.
«Бир неча британиялик депутатлар томонидан Шинжонда геноцид юз бераётгани тўғрисидаги асоссиз айблов — бу асрнинг энг бемаъни ёлғони, Хитой халқига нисбатан оғир ҳақорат, шунингдек, халқаро ҳуқуқ ва халқаро муносабатларнинг асосий нормаларини қўпол равишда бузишдир. Хитой Буюк Британиянинг мамлакат ички ишларига аралашишига қатъиян қарши», — дейилади элчихонанинг баёнотида.
Аввалроқ АҚШ, Канада ва Буюк Британия Хитойни «уйғурлар геноциди»да айблаб, унга қарши санкциялар киритган эди. Шунингдек, АҚШ уйғурларга қилинаётган зуғумлар сабаб Шинжондан пахта импортини чеклаб қўйгани ҳамда Пекинда ўтказиладиган 2022 йилги қишки Олимпиадани бойкот қилиши мумкинлиги ҳақида хабар берилган.
Хитой АҚШ ва Канадани Шинжон-Уйғур автоном ҳудуди туфайли Хитойга қарши уюштирган «хато ҳаракатларини» тузатишга ва Хитойнинг ички ишларига аралашишни бас қилишга чақирди.
Эслатиб ўтамиз, Хитойда H&M, Nike ва яна бир нечта халқаро корпорацияларининг маҳсулотларига қарши бойкот бошланган. Таъкидланишича, улар Шинжон-Уйғур автоном ҳудудидаги пахта далаларида одамларга қуллардек муносабатда бўлинаётгани ҳақидаги баёнотлар билан мамлакат ички сиёсатига аралашгани қайд этилган.
Шинжонда содир бўлаётган воқеалар муҳокамаси Хитойдаги энг можароли мавзулардан бири ҳисобланади. Маҳаллий ижтимоий тармоқларда фойдаланувчилар ҳудуддаги вазият муҳокамаси, у ердаги ҳолатларни шунчаки эслаб ўтгани туфайли ҳам тез-тез блокланади. Human Rights Watch ҳуқуқни ҳимоя қилувчи ташкилоти таҳлилчилари ғарб брендларига қарши кампаниянинг ҳукумат учун жиддий оқибатларга олиб келиши мумкинлигини тахмин қилган. Сабаби аввал Шинжонда уйғурларнинг ҳуқуқлари поймол бўлаётгани ҳақида билмаган фойдаланувчилар вазиятга жиддий қизиқишни ва ижтимоий тармоқларда у ерда ҳақиқатда нима бўлаётгани ҳақида ахборот излашни бошлаб юборган.
