АҚШ президенти Жо Байден июнь ойида давлат раҳбари сифатида биринчи бор чет элга сафар қилади. У Буюк Британия ва Бельгияга боради, деб хабар берди «РБК» Оқ уй веб-сайтига таяниб.
Фото: AP Photo
«Ушбу саёҳат Жо Байденнинг келишувларимизни тиклаш, Трансатлантик муносабатларни жонлантириш ва глобал муаммоларни ҳал қилиш, шунингдек, Америка манфаатларини янада яхшироқ ҳимоялаш учун иттифоқчиларимиз ва ҳар томонлама шерикларимиз билан яқин ҳамкорликда ишлашга доимий содиқлигини намоён қилади»,— дейилади маъмурият хабарида.
Хабарга кўра, Байден 11—13 июнь кунлари Британиянинг Корнуолл графлигида бўлиб ўтадиган G7 давлатлар саммитида иштирок этади. Унда Америка президенти «АҚШ соғлиқни сақлаш сиёсатининг асосий устувор йўналишларини илгари суриш, иқтисодиётни тиклаш ва иқлим ўзгариши масалалари устида ишлайди». Саммит доирасида Буюк Британия бош вазири Борис Жонсон сингари G7 давлатларининг бошқа раҳбарлари билан икки томонлама учрашувлар ўтказиш режалаштирилган.
«Шундан сўнг Байден 14 июнь куни бўлиб ўтадиган НАТО саммитида иштирок этиш учун Бельгияга йўл олади. Альянс раҳбарлари НАТОнинг келажакдаги таҳдидларга қандай жавоб бериши кераклигини муҳокама қилади, шунингдек, иттифоқ доирасида харажатларни самарали тақсимлаш масаласини ҳал қилади», — деди Оқ уй.
Бундан ташқари, президент Европа Иттифоқи ва АҚШ саммитида иштирок этиши маълум қилинди. Таъкидланишича, кун тартибида глобал хавфсизлик, соғлиқни сақлаш, глобал иқтисодий тикланиш, рақамли ва савдо соҳасидаги ҳамкорликни кенгайтириш, иқлим ўзгариши, демократияни мустаҳкамлаш ва умумий ташқи сиёсий муаммоларни ҳал қилиш бўйича муҳокамалар мавжуд.
Жо Байден 2020 йил ноябрь ойида бўлиб ўтган сайловларда президент этиб сайланган ва 2021- йилнинг январида расмий равишда иш бошлаган эди.
Байденнинг чет эл раҳбари билан биринчи телефон суҳбати 23 январь куни Канада бош вазири Жастин Трюдо билан бўлиб ўтди. Бир неча кундан кейин Байден Путин билан телефонда гаплашди, суҳбат, тахминан, ярим соат давом этди.
13 апрель куни навбатдаги телефон суҳбатида Байден Путинга нейтрал ҳудуд сифатида «учинчи мамлакатда» учрашишни таклиф қилди. Оқ уй учрашув ёзда бўлиб ўтиши мумкин, деб тахмин қилди, аммо Кремль маълум бир жой ва вақт ҳақида гапириш ҳали эрталигини айтди.
