AQSh prezidenti Jo Bayden iyun oyida davlat rahbari sifatida birinchi bor chet elga safar qiladi. U Buyuk Britaniya va Belgiyaga boradi, deb xabar berdi “RBK” Oq uy veb-saytiga tayanib.
“Ushbu sayohat Jo Baydenning kelishuvlarimizni tiklash, Transatlantik munosabatlarni jonlantirish va global muammolarni hal qilish, shuningdek, Amerika manfaatlarini yanada yaxshiroq himoyalash uchun ittifoqchilarimiz va har tomonlama sheriklarimiz bilan yaqin hamkorlikda ishlashga doimiy sodiqligini namoyon qiladi”,— deyiladi ma’muriyat xabarida.
Xabarga ko‘ra, Bayden 11—13-iyun kunlari Britaniyaning Kornuoll grafligida bo‘lib o‘tadigan G7 davlatlar sammitida ishtirok etadi. Unda Amerika prezidenti “AQSh sog‘liqni saqlash siyosatining asosiy ustuvor yo‘nalishlarini ilgari surish, iqtisodiyotni tiklash va iqlim o‘zgarishi masalalari ustida ishlaydi”. Sammit doirasida Buyuk Britaniya bosh vaziri Boris Jonson singari G7 davlatlarining boshqa rahbarlari bilan ikki tomonlama uchrashuvlar o‘tkazish rejalashtirilgan.
“Shundan so‘ng Bayden 14-iyun kuni bo‘lib o‘tadigan NATO sammitida ishtirok etish uchun Belgiyaga yo‘l oladi. Alyans rahbarlari NATOning kelajakdagi tahdidlarga qanday javob berishi kerakligini muhokama qiladi, shuningdek, ittifoq doirasida xarajatlarni samarali taqsimlash masalasini hal qiladi”, — dedi Oq uy.
Bundan tashqari, prezident Yevropa Ittifoqi va AQSh sammitida ishtirok etishi ma’lum qilindi. Ta’kidlanishicha, kun tartibida global xavfsizlik, sog‘liqni saqlash, global iqtisodiy tiklanish, raqamli va savdo sohasidagi hamkorlikni kengaytirish, iqlim o‘zgarishi, demokratiyani mustahkamlash va umumiy tashqi siyosiy muammolarni hal qilish bo‘yicha muhokamalar mavjud.
Jo Bayden 2020-yil noyabr oyida bo‘lib o‘tgan saylovlarda prezident etib saylangan va 2021- yilning yanvarida rasmiy ravishda ish boshlagan edi.
Baydenning chet el rahbari bilan birinchi telefon suhbati 23-yanvar kuni Kanada bosh vaziri Jastin Tryudo bilan bo‘lib o‘tdi. Bir necha kundan keyin Bayden Putin bilan telefonda gaplashdi, suhbat, taxminan, yarim soat davom etdi.
13-aprel kuni navbatdagi telefon suhbatida Bayden Putinga neytral hudud sifatida “uchinchi mamlakatda” uchrashishni taklif qildi. Oq uy uchrashuv yozda bo‘lib o‘tishi mumkin, deb taxmin qildi, ammo Kreml ma’lum bir joy va vaqt haqida gapirish hali ertaligini aytdi.
Izoh (0)