Сурхондарёда 2021 йилнинг январида қувиб ўтиш қоидасини бузиб, одамлар ўлимига сабаб бўлган Nexia-2 ҳайдовчисига жиноят иши қўзғатилгани ҳақида хабар берилган эди. Олий суд матбуот хизмати унга нисбатан қандай жазо тайинланганини маълум қилди.
Воқеа 26 январь куни халқаро аҳамиятли М-41 автомобиль йўлининг «Термиз—Жарқўрғон» йўналиши 1611-километрида содир бўлган. Nexia-2 ҳайдовчиси қариндошининг номига расмийлаштирилган автомашинани ҳайдаш ҳуқуқини берувчи ҳужжатларсиз бошқариб, ўзидан олдинда ҳаракатланаётган транспорт воситасини қувиб ўтиш мақсадида йўлнинг қарама-қарши ҳаракат бўлагига ўтиб, бир нечта транспорт воситаларини катта тезликда қувиб ўтиб, чап томонга қайрилишни амалга ошираётган Nexia-3’нинг олд чап томонига бориб урилган.
Тўқнашув оқибатида бошқарувни йўқотиб, йўлнинг чап томон четига бир неча марта ағдарилиб кетган. Оқибатда ушбу машина ичида бўлган йўловчилардан икки аёл ва бир нафар вояга етмаган бола вафот этган.
Nexia-2 ҳайдовчисига нисбатан Жиноят кодексининг 266-моддаси 3-қисми «а» банди (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлиши) билан уч йил муддатга барча турдаги транспорт воситаларини бошқариш ҳуқуқидан маҳрум қилиниб, уч йил муддатга озодликдан маҳрум қилиш жазоси тайинланди.
Аввалроқ Сурхондарёда Cobalt ва Spark тўқнашуви оқибатида 6 киши ҳалок бўлгани, ҳайдовчилардан бири 8 йилга қамалгани ҳақида хабар берилган эди.
Изоҳ (0)