Хитой ҳукумати учун люкс автомобилларни ишлаб чиқаришга ихтисослашган Hongqi маркаси Шанхайда L-Concept номли концептини тақдим этди, деб хабар беради Motor.
Hongqi L-Concept композит материаллардан ишланган оқ том ва икки хил рангли кузовга эга бўлган. Автомобильнинг анъанавий орқа ойнаси мавжуд эмас — унинг ўрнини ромбсимон декорли панел эгаллаган. Мураккаб геометрик нақшларни эшик картлари ва салоннинг олд панелларида ҳам учратиш мумкин.
Шоу-карнинг ўзига хос бошқа жиҳатлари — вертикал жойлашган олд оптика, катта радиатор панжараси, тўртта горизонтал диод чизиқлардан иборат фонарлар ва ҳаракат йўналишига қарши очилувчи орқа эшиклар.
Hongqi («қизил байроқ») FAW Group концернига тегишли бўлиб, 1958 йилдан буён Хитой элитаси учун ҳашаматли автомобилларни яратиб келади.
Hongqi L-Concept салони тўқ қизил ва оқ чарм билан қопланган, ёғоч ва силлиқланган алюминий билан безатилган, пол қисмига жунли гиламчалар тўшалган. Фастбекнинг рули, шунингдек, олд йўловчи ўриндиғи йўқ (шу билан бирга, ўнг тарафда олд панел мавжуд). Яна бир эътиборли жиҳати — орқа ўриндиқларни ажратиб турувчи қисм шифтига ўрнатилган биллур қандил.
Ҳозирча Hongqi L-Concept’га ўрнатиладиган двигателга оид маълумотлар сир тутилмоқда. Хитой ОАВларининг ёзишича, иш концепт билан чекланмайди: 2023 йилда ноодатий модель серияли версияда ишлаб чиқарилади.
Эслатиб ўтамиз, 2020 йилнинг ёзида Hongqi маркаси H9 флагман седанининг прайс-листини эълон қилганди. Ҳашаматли тўрт эшикли Hongqi нархи 330 минг юанни (47 минг доллар) ташкил этмоқда — бу Mercedes-Benz E-Class’дан уч баробарга арзонроқ.
Изоҳ (0)