Наманган вилояти Поп туманида юк машинаси пиёдани уриб кетиб, воқеа жойидан яширинган, дея хабар бермоқда вилоят ИИБ матбуот хизмати.
Қайд этилишича, 2021 йил 18 апрель куни соат 03:30 ларда Поп тумани Тошкент–Ўш йўлининг 284-километрида «Қўшминор» МФЙ ҳудудида номаълум ҳайдовчи автомашинасини Тошкент–Водий йўналиши бўйлаб бошқариб бораётиб ҳаракат хавфсизлигини таъминлай олмай, пиёдани уриб юборган.
Оқибатда пиёда тан жароҳати олиб, воқеа жойида вафот этган.
Ушбу ҳолат бўйича вилоят ҳудудида «Тўсиб ушлаш» махсус режаси ҳаракатга келтирилиб, вилоят ИИБ ЖҚБ, ЙҲХБ ва туман ИИБ ходимлари томонидан тезкор қидирув ва суриштирув ҳаракатлари олиб борилган.
Натижада ушбу жиноятни Андижон шаҳрида яшовчи, 1986 йилда туғилган фуқаро MAN русумли юк автомашинасида пиёдани уриб юбориб, уни ҳаётини хавф остида қолдириб, ҳодиса жойидан кетиб қолгани аниқланган.
Автомашина жарима майдонига қўйилиб, тегишли кўргазмалар олинган.
Ушбу ҳолат бўйича туман ИИБ ҳузуридаги Тергов бўлинмаси томонидан Жиноят кодексининг 266-моддаси 2-қисми (одам ўлимига сабаб бўлган транспорт қоидаларини бузиш) ва 117-моддаси 2-қисми (ҳаёти ёки соғлиғи хавф остида қолган шахсга ёрдам кўрсатмаслик) билан жиноят иши қўзғатилган.
Бундан аввал Наманганда машинаси билан пастликка тушиб кетган Damas ҳайдовчиси вафот этгани, Сирдарёда Nexia ва икки юк машинаси иштирокидаги ЙТҲ натижасида 2 киши вафот этгани ҳамда Самарқандда пиёда Matiz уриб кетиши оқибатида вафот этгани ҳақида хабар берилганди.
Изоҳ (0)