Бугун,

  • USD 10940.05
  • RUB 182.26
  • EUR 11121.65

Суд ҳайъати Миннеаполис шаҳрининг собиқ полициячиси Дерек Шовинни афроамерикалик Жорж Флойдни эҳтиётсизлик орқасида одам ўлдиришда айбдор деб топди. Бу ҳақда Meduza хабар бермоқда.

Фото: DW

Фото: DW

Шовин айбловнинг барча учта банди бўйича айбдор деб топилди. Уларнинг энг оғири — қасддан содир этилмаган иккинчи даражали қотиллик — 40 йилгача озодликдан маҳрум этишни кўзда тутади.

Шовинга нисбатан ҳукм тахминан саккиз ҳафтадан кейин ўқилади.

Шовиннинг ўзи айбини тан олмади ва судда кўрсатма беришдан бош тортди.

Суддан кейин Шовин Миннесота штатидаги Оук-Парк-Хайц ахлоқ тузатиш муассасасига жойлаштирилди.

Суд ҳайъати собиқ полициячини айбдор деб топганидан кейин АҚШ президенти Жо Байден ва вице-президент Камала Ҳаррис Жорж Флойднинг оиласига қўнғироқ қилди. АҚШ президенти суд жараёнини бош маслаҳатчиси ва вице-президент билан биргаликда кузатиб борганини таъкидлади. Ўз навбатида, Ҳаррис Флойднинг оиласини тарихга ўзгариш ясайдиган бир пайтда «ҳақиқий етакчилик» кўрсатгани учун мақтади.

Жорж Флойд Миннеаполисда 2020 йил май ойида ўлдирилган эди. Уни 20 долларлик қалбаки пулдан фойдаланишда гумон қилиб қўлга олишга уринишган. Қўлга олиш пайтида Дерек Шовин тиззаси билан Флойднинг бўйнини босиб, саккиз дақиқача шу ҳолатда турган, афроамерикалик нафас ололмаётгани ҳақида бир неча марта айтгани кор қилмаган.

Флойднинг ўлими дастлаб Миннеаполисда, сўнг АҚШнинг қолган барча шаҳарларида, ундан кейин дунёнинг бошқа мамлакатларида ҳам ирқчиликка қарши норозилик намойишларини келтириб чиқарди. Шовин ва унинг Флойдни ҳибсга олишда иштирок этган икки нафар ҳамкасби полициядан қувилди ва уларга нисбатан айбловлар эълон қилинди.

Иккинчи даражали қотиллик — АҚШда қасддан содир этилмаган қотиллик шундай аталади. Бунинг учун биринчи даражали (қасддан содир этилган) қотилликдаги каби қатъий жазо кўзда тутилмаган.

Изоҳ
Асосий янгиликлар