Ижтимоий тармоқда «Махсус эвакуатор устида турган Matiz радарга тушди» сарлавҳаси остидаги хабар тарқалди. Ушбу хабар юзасидан ЙҲХББ изоҳ берди.
Таъкидланишича, мазкур ҳолат 2020 йилда Сирдарё вилояти, Гулистон шаҳрида содир бўлган.
Қайд этилишича, 2020 йил 9 апрель куни Гулистон шаҳар ҳудудида ўтказилаётган рейд тадбири давомида 20 F 814 DА давлат рақам белгили Matiz автомашинаси ҳайдовчиси карантин қоидаларини бузиб, вилоят марказида ҳаракатланиб юрганлиги сабабли ҳайдовчига нисбатан маъмурий баённома расмийлаштирилиб, автомашина жарима майдончасига жойлаштиришга жўнатилган.
20 E 298 DА давлат белгили Mercedes-Benz Sprint русумли махсус эвакуатор Matiz’ни жарима майдончасига олиб кетаётиб, Ўзбекистон кўчасида юқори тезлик 60 километр/соат белгиланган жойда 70 километр/соат тезликда ҳаракатланган вақтда тезликни ўлчовчи мослама, яъни радарга тушган.
Радар тезлик ўлчовчи мослама автоматик тартибда ушбу махсус эвакуатор автомашинаси устига ортилган Matiz’ни ҳам суратга олиб, марказлашган базага жўнатган.
Қарор ижро этишлик учун Сирдарё вилояти ИИБ ЙҲХБ масъул ходимига келиб тушгандан сўнг эса унинг асослигини ва бошқа реквизитлари тўғрилигини тасдиқлаш вақтида фақатгина махсус эвакуатор юк машинаси тезликни оширганлиги сабабли жарима солиш тўғрисидаги қарор тасдиқланиб, мулкдорнинг яшаш манзилига почта орқали жўнатилган.
Бундан аввал Қорақалпоғистонда ЙПХ ходими фуқарони қувлаб, ургани акс этган видео тарқалгани, Жиззахда қоидани бузган ҳайдовчини сўккан ЙПХ ходимига нисбатан хизмат текшируви тайинлангани ҳамда Фарғонада ҳайдовчи Damas’да 28 нафар боғча боласини олиб кетаётгани аниқлангани ҳақида хабар берилганди.
