Ijtimoiy tarmoqda “Maxsus evakuator ustida turgan Matiz radarga tushdi” sarlavhasi ostidagi xabar tarqaldi. Ushbu xabar yuzasidan YHXBB izoh berdi.
Ta’kidlanishicha, mazkur holat 2020-yilda Sirdaryo viloyati, Guliston shahrida sodir bo‘lgan.
Qayd etilishicha, 2020-yil 9-aprel kuni Guliston shahar hududida o‘tkazilayotgan reyd tadbiri davomida 20 F 814 DA davlat raqam belgili Matiz avtomashinasi haydovchisi karantin qoidalarini buzib, viloyat markazida harakatlanib yurganligi sababli haydovchiga nisbatan ma’muriy bayonnoma rasmiylashtirilib, avtomashina jarima maydonchasiga joylashtirishga jo‘natilgan.
20 E 298 DA davlat belgili Mercedes-Benz Sprint rusumli maxsus evakuator Matiz’ni jarima maydonchasiga olib ketayotib, O‘zbekiston ko‘chasida yuqori tezlik 60 kilometr/soat belgilangan joyda 70 kilometr/soat tezlikda harakatlangan vaqtda tezlikni o‘lchovchi moslama, ya’ni radarga tushgan.
Radar tezlik o‘lchovchi moslama avtomatik tartibda ushbu maxsus evakuator avtomashinasi ustiga ortilgan Matiz’ni ham suratga olib, markazlashgan bazaga jo‘natgan.
Qaror ijro etishlik uchun Sirdaryo viloyati IIB YHXB mas’ul xodimiga kelib tushgandan so‘ng esa uning asosligini va boshqa rekvizitlari to‘g‘riligini tasdiqlash vaqtida faqatgina maxsus evakuator yuk mashinasi tezlikni oshirganligi sababli jarima solish to‘g‘risidagi qaror tasdiqlanib, mulkdorning yashash manziliga pochta orqali jo‘natilgan.
Bundan avval Qoraqalpog‘istonda YPX xodimi fuqaroni quvlab, urgani aks etgan video tarqalgani, Jizzaxda qoidani buzgan haydovchini so‘kkan YPX xodimiga nisbatan xizmat tekshiruvi tayinlangani hamda Farg‘onada haydovchi Damas’da 28 nafar bog‘cha bolasini olib ketayotgani aniqlangani haqida xabar berilgandi.
Izoh (0)