Буюк Британия таркибида бўлган Уэльс шимолидаги соҳил бўйида 19 апрель куни улкан кўчки содир бўлди. Бу ҳақда The Watchers маълумотларига таяниб «Korrespondent.net» хабар берди.
Хабар берилишича, кўчки Гвинед қироллигидаги Нефин шаҳарчаси соҳилларида содир бўлди. Гувоҳларнинг сўзларига кўра, кўчкининг қалинлиги энг камида 40 метрни ташкил қилади. Ушбу ҳудуд хавфли чўкиш зонаси рўйхатига киритилган бўлиб, у ернинг қирғоқлари кучли эрозияга учраган.
Таъкидланишича, мавсумдаги ғайриоддий қурғоқчилик пайтида ушбу кўчкининг юзага келиши кўплаб қизиқишларга сабаб бўлмоқда.
Полиция ҳудудни назорат остига олди. Вазият ойдинлашмагунига қадар маҳаллий аҳолига кўчкидан узоқроқ юриш тавсия этилмоқда.
Аввалроқ Индонезиянинг шарқий қисмида ва унга қўшни бўлган Шарқий Тиморда кучли ёғингарчиликлар кетма-кет кўчки ва тошқинларни келтириб чиқарди, бунинг натижасида 52 киши қурбон бўлди.
АҚШнинг Алабама ва Техас штатларида эса торнадо содир бўлгани ва деярли 70 минг уй электр энергиясидан узилиб қолгани ҳақида хабар берилди. Табиий офат оқибатида юзлаб уйлар зарар кўрди, дарахтлар қулади, бир нечта трасса ёпилиб қолди.
Шунингдек, Мексикада шимолий Коуэла ва Нуэво-Леон штатлари чегарасида содир бўлаётган йирик ўрмон ёнғини туфайли 1100 киши эвакуация қилинди.
Изоҳ (0)