Россия Ҳаво-космик кучлари (ҲКК) самолётларининг Суриядаги авиазарбаси оқибатида, тахминан, 200 нафар жангари йўқ қилинди. Бу ҳақда Мудофаа вазирлигининг Низоли томонларни яраштириш ва қочқинлар ҳаракатини назорат қилиш марказига таяниб, «РБК» хабар берди.
«Бир нечта каналлар орқали террорчилар объектларининг жойлашув ўрни аниқлангач, Россиянинг ҲКК самолётлари орқали ҳаво зарбалари берилди», — дейилади хабарда.
Натижада террорчиларнинг иккита яширин жойи, йирик калибрли пулемёт билан жиҳозланган 24 та пикапи, шунингдек, тахминан 500 килограмм ўқ-дори ва қўлбола портловчи мосламаларни ясаш учун зарур қисмлар йўқ қилинди.
Россиялик ҳарбийларнинг маълумотларига кўра, мамлакатдаги вазиятни изидан чиқаришни мақсад қилган жангарилар Суриядаги президентлик сайловлари арафасида йирик шаҳарлардаги давлат идораларига қарши теракт ва ҳужумларни режалаштирган. Ҳужумлар Палмиранинг шимоли-шарқидаги яширин базада тайёрланаётган эди, деб хабар берди Томонларни яраштириш маркази.
«Террорчиларни тайёрлаш Сурия ҳукумати томонидан назорат қилинмайдиган ҳудудларда, шу жумладан, Ат-Танф зонасидаги ҳарбийларнинг ўқув лагерларида олиб борилмоқда», — деб ахборот берди Мудофаа вазирлиги.
Март ойининг охирида Россия ҳарбийлари «Ҳаёт Таҳрир аш-Шом» террорчи ташкилотининг жангарилари Суриянинг Идлиб провинциясида кимёвий ҳужум уюштиришни режалаштиргани ҳақида хабар берган эди. Бу орқали террорчилар Сурия ҳукуматини фуқароларга ҳужум қилишда айбламоқчи бўлган.
Аввалроқ Нигериянинг шимоли-шарқидаги Борно штатида «Боко ҳарам» жангарилари навбатдаги қуролли ҳужумни амалга оширганди. Натижада 18 киши ҳалок бўлиб, 21 киши жароҳатланган.
Изоҳ (0)