Тошкент шаҳри Учтепа туманида кўп миқдорда қалбаки АҚШ долларини муомалага киритмоқчи бўлган шахс ушланди, дея хабар қилмоқда Бош прокуратура ҳузуридаги Департамент матбуот хизмати.
Қайд этилишича, Департаментнинг Учтепа туман бўлими томонидан Миллий гвардия ходимлари билан ҳамкорликда ўтказилган тезкор тадбирда, фуқаро Ж.И. қалбаки валютани муомалага киритиш мақсадида, фуқаро Р.дан Сигвей номли воситани 50 АҚШ долларига сотиб олган вақтда ашёвий далиллар билан ушланган.
Шунингдек, фуқаро Ж.И. Р.дан 58 қути Orbit сақичларини сотиб олишда қалбаки 6 300 АҚШ долларини берганлиги аниқланиб, жами 6 350 қалбаки АҚШ доллари ашёвий далил сифатида олинган.
Мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Андижонда қалбаки долларлар эвазига 9 та iPhone 12 сотиб олишга, Наманганда эса қалбаки пулларни банкка ўтказишга уринган шахслар ушлангани, Фарғонада 99 дона 100 минг сўмлик қалбаки купюрани сотган шахсга жиноят иши қўзғатилгани ҳамда Фарғонада қалбаки 25 минг долларни муомалага киритмоқчи бўлган шахслар қўлга олингани ҳақида хабар берилганди.
Изоҳ (0)