Farg‘ona viloyatining Bag‘dod tumanida pullarni qalbakilashtirish bilan shug‘ullangan shaxsga jinoyat ishi qo‘zg‘atildi. Bu haqda IIV Tergov departamenti xabar berdi.
Ma’lum qilinishicha, Bag‘dod tumani IIB JQB xodimlari tomonidan 1-aprel kuni o‘tkazilgan tezkor tadbirda 36 yoshli M.M. shartli ravishda xaridor sifatida jalb qilingan fuqaroga 2,7 million so‘m evaziga 99 dona 100 ming so‘mlik kupyuradan iborat jami 9,9 million so‘m qiymatiga teng soxta pullarni sotgan vaqtida ushlangan.
Tergov harakatlari davomida M.M.ning yashash xonadoni xolislar ishtirokida ko‘zdan kechirilib, soxta pullarni tayyorlashda foydalanilgan bir dona Lenovo rusumli noutbuk va HP rusumli rangli printer hamda 5000 so‘mlik kupyuradagi 200 dona jami 1 million so‘m soxta pullar ashyoviy dalil tariqasida rasmiylashtirib olingan.
M.M.ga nisbatan Jinoyat kodeksining 176-moddasi 1-qismi (qalbaki pullar yasash, ularni o‘tkazish) bilan jinoyat ishi qo‘zg‘atilgan. Hozirda tergov davom etmoqda.
Ma’lumot uchun, Jinoyat kodeksida ushbu jinoyatni sodir etganlik uchun 2 yildan 5 yilgacha ozodlikni cheklash yoxud 5 yilgacha ozodlikdan mahrum qilish jazosi belgilangan.
Avvalroq Farg‘onada qalbaki 100 dollarlik kupyurani muomalaga kiritmoqchi bo‘lgan shaxsga jinoyat ishi qo‘zg‘atilgani, qalbaki 25 ming dollarni muomalaga kiritmoqchi bo‘lgan shaxslar ushlangani haqida xabar berilgan edi.
Izoh (0)