Флорентино Перес шахсияти «Реал» учун жуда муҳим бўлиб, у клуб ва унинг ташқарисида содир бўладиган барча нарсаларни шахсан ўзи назорат қилишга ҳаракат қилади. Флорентино 2009 йилдан бери жамоани бошқараётган бўлса ҳам, у «қироллик клуби»ни худди асрлар давомида назорат қилаётганга ўхшайди. Яқинда у учинчи марта президентликка тасдиқланди. Функционернинг биринчи муддати 2000 йилдан 2006 йилга қадар давом этган. Иккинчи муддат эса шу кунгача, аниқроғи 12 йилдан бери давом этаётганди. Флорентинонинг асосий мақсади ҳар доим дунёнинг энг яхши футболчилари «Реал»да ўйнашини таъминлаш бўлган. Ушбу мақсадга эришиш учун функционер ҳалигача ҳеч нарсани аямайди. Қуйида айнан «қироллик клуби»нинг Перес даврида амалга оширилган энг қиммат трансферлари ҳақида фикр юритилади.
Ферлан Менди — 2019 йил, 48 миллион евро
Менди «Реал»га 2019 йилнинг июлида келиб қўшилган. «Қаймоқранглилар» франциялик футболчи учун «Лион»га 48 миллион евро тўлаган. Зинедин Зидан дарҳол ватандошини ўз қанотига олди, бундан ҳатто Серхио Регилон жабр ҳам кўрди. Мадрид клуби ўз тарбияланувчисини дастлаб «Севилья»га ижарага берди, кейинроқ эса «Тоттенҳэм»га сотиб юборди. Аммо Менди мураббийнинг ишончини оқлади. Ҳозирда у «қироллик клуби»нинг асосий чап қанот ҳимоячиси бўлиб, Марселодек ўйинчини захирага «михлаб қўйган». Умуман олганда, ушбу трансферни Перес ва клуб директорлар кенгаши учун муваффақиятли деб ҳисоблаш мумкин.
Эдер Милитао — 2019 йил, 50 миллион евро
«Реал» доимий равишда иқтидорли бразилияликларни қидириб келган, уларнинг кўпчилиги эса биринчи имкониятдаёқ сотиб олинади. Улардан бири Милитаодир. У «Сан-Паулу»ни тарк этгач, «Порту»га кўчиб ўтади, ҳимоячи у ерда атиги 1 йил ўйнайди. Шундан сўнг уни 50 миллион евро эвазига «қироллик клуби» сотиб олди. Милитао «Реал»да ўзининг иккинчи мавсумини ўтказмоқда. Ҳозирча бразилияликни барқарор ҳаракат қилмоқда деб айтиш қийин, боиси у кам ўйин амалиётига эга бўлмоқда. Аммо шундай бўлиши кутилган эди. У асосий таркибдан жой олиши учун Рафаэл Варан ва Серхио Рамосдан бирини захирада қолдириши керак бўлади. Бу эса деярли имконсиз иш. Милитао асосий ҳимоячилар сафдан чиққан тақдирдагина майдонга тушиши мумкин. Сўнгги ўйинларда эса айнан шундай ҳолат юз бериб турибди. Варан коронавирус билан касалланган, Рамосда эса жароҳат. Ҳимоя марказида эса Милитао ва Начо тандеми «Реал»га қўрғон вазифасини ўтамоқда.
Луиш Фигу — 2000 йил, 60 миллион евро
Фигунинг трансфери «Реал»да Перес даврини бошлаб берган. Айнан Фигунинг трансфери Флорентинонинг сайловлардаги ғалабасини таъминлаган. Ўша даврда бутун Испанияни ростдан ҳам португалиялик «Барселона»дан «Реал»га ўтадими деган савол қизиқтирарди. Якунда ҳақиқатан ҳам Перес ваъда қилганидек, Фигу Мадрид клуби футболчисига айланади.
Мадридда Фигу фаолиятининг яхши қисмини ўтказди дейиш мумкин. У «қаймоқранглилар» билан биргаликда 2 мартадан Ла Лига ва Испания Суперкубогида, шунингдек, 1 мартадан Чемпионлар Лигаси, УЕФА Суперкубоги ва Қитъалараро кубокда ғолиб чиққан. Испаниядаги миссиясини якунлагач, Фигу Италияга йўл олади ва «Интер»да фаолиятини якунлайди.
Лука Йович — 2019 йил, 63 миллион евро
Йович бундан 2 йил олдин «Реал»га ўтган, аммо унинг келажаги ҳамон сўроқ остида қолмоқда. Сербиялик «қироллик клуби» сафида 32 та ўйин ўтказиб, атиги 2 тадан гол ва голли узатмани амалга оширган. Бу марказий ҳужумчи учун ўта паст кўрсаткич ҳисобланади. Қишки трансферлар ойнаси вақтида Йович ижара асосида «Айнтрахт»га қайтди. Франкфурт клубида сербиялик футболчининг ишлари ёмон кетмаяпти – Бундеслиганинг 12 учрашувида 3 та гол. Ҳужумчи келаси мавсумни қаерда бошлаши номаълум. Футболчининг ўзи «Айнтрахт»да қолиш имкониятини истисно этмаяпти, аммо «Реал»га қайтиш эҳтимоли ҳам йўқ эмас. Бу ерда ҳаммаси Флорентино бошлиқ клуб раҳбариятининг режаларига боғлиқ.
Кака — 2009 йил, 67 миллион евро
Каканинг трансфери Переснинг иккинчи президентлик муддати бошланишига тўғри келган. «Қаймоқранглилар» ўшанда футболчи учун «Милан»га 67 миллион евро тўлаганди. Кака Мадрид клубида 4 йилини ўтказди, аммо бу даврни футболчи учун жуда муваффақиятли ўтган деб бўлмайди. Ярим ҳимоячи жамоа билан биргаликда атиги 1 мартадан Испания чемпионати ва мамлакат Кубогида зафар қучган. Кака «Милан»да кўплаб муваффақиятларга эришганди, бразилиялик «Реал»даги фаолиятидан кейин айнан яна эски клубига қайтади, аммо унинг Италиядаги кейинги «юриши» атиги 1 йил давом этади, холос. Кака ҳақида гап кетганида яна бир фактни алоҳида таъкидлаш керак, айнан у Криштиану Роналду ва Лионель Месси даври бошланишидан олдин «Олтин тўп»га эга чиққан сўнгги футболчи ҳисобланади.
Хамес Родригес — 2014 йил, 75 миллион евро
Хамесни Перес Карло Анчелоттининг талабига биноан сотиб олган. «Қаймоқранглилар» ҳужумкор ярим ҳимоячи учун «Монако»га 75 миллион евро тўлаган. Италиялик мутахассис қўл остида Родригес ёмон ҳаракат қилмади. Аммо Анчелотти ишдан бўшатилгандан сўнг колумбияликда ўйин амалиёти билан биргаликда самарадорлик ҳам сезиларли даражада камая бошлади. Шундан сўнг Хамес икки мавсумни «Бавария»да ижара асосида ўтказди. Аммо Мюнхен клуби уни сотиб олишни хоҳламади, мадридликлар ҳам унга ортиқ ишонишни истамасди. Аммо шу вақтда яна Анчелотти пайдо бўлди ва ярим ҳимоячини «Эвертон»га олиб келди. Англияда футболчининг ишлари анча яхшиланди. Мерсисайд клуби ҳали Чемпионлар Лигаси даражасига чиқмаган бўлса ҳам, жамоа истиқболли лойиҳаларга эга.
Зинедин Зидан — 2001 йил, 77,5 миллион евро
Зидан Переснинг қиммат трансферларини бошлаб берган харидлардан биридир. «Қироллик клуби»нинг амалдаги мураббийи жамоага 2001 йилнинг ёзида «Ювентус»дан 77,5 миллион евро эвазига кўчиб ўтган. Француз Мадридга тажрибали ва совриндор футболчи сифатида келганди. Зизу футболчи сифатида 5 йил ичида икки бор Испания Суперкубогини, шунингдек, бир мартадан Ла Лига, Чемпионлар Лигаси, УЕФА Суперкубоги, қитъалараро Кубок ва Интертото Кубогини қўлга киритган. Мураббий Зидан нималар қилгани эса ҳаммага яхши маълум. Франциялик кетма-кет уч марта бир клуб билан Чемпионлар Лигасида ғалаба қозонган биринчи ва ягона мутахассис ҳисобланади. Сўнгги пайтларда Зиданинг жамоани тарк этиши, раҳбарият унинг ишидан қониқмаётгани ҳақида кўплаб хабарлар тарқалмоқда. Аммо Зидан ҳамон жамоа бош мураббийилигича қолмоқда ва жамоасини олға бошлашда давом этмоқда.
Криштиану Роналду — 2009 йил, 94 миллион евро
Роналдунинг трансфери «Реал» учун Перес давридаги энг муваффақиятли харидлардан бири ҳисобланади. Криштиану Мадридда нафақат «гол машинаси» вазифасини бажарар, балки «қироллик клуби»га қўшимча миллионларни олиб келадиган бренд ҳам эди. Испания пойтахтида португалиялик шунчаки мўъжизавий статистика кўрсатарди. У фақат Ла Лиганинг ўзида 40, 46 ва ҳатто 48 талаб гол урган мавсумлар бўлган. Тўққиз йиллик муваффақиятли ҳамкорликдан сўнг клуб ва футболчининг йўллари айро тушди: 2018 йилнинг ёзида Роналду «Ювентус»га ўтиб кетди, «қаймоқранглилар» эса шундан бери ўзи хоҳлаганидек ҳужумчига эга бўла олмаяпти. Умуман олганда, Роналду ҳам «Реал»дан кетгач, (клуб миқёсида) катта ғалабаларга эришгани йўқ. Узунқулоқ гапларга кўра томонлар камида яна 1 мавсумга бирлашиши мумкин, аммо ҳозирча бу миш-мишдан нарига ўтмаяпти.
Гарет Бэйл — 2013 йил, 101 миллион евро
Бэйл «Реал» 100 миллион евродан кўпроқ тўлаган биринчи футболчи бўлган. Гарчи сўнгги вақтлар жароҳатларга ўралашиб қолган бўлса-да, Гаретнинг трансфери ўзини оқлаган дейиш мумкин. Бэйл оптимал спорт формасида бўлган вақтда кўплаб учрашувларда «Реал»га катта ёрдам берган ва мавсумига 16 ва 19 талаб гол урган. Шунингдек, Гарет энг муҳим учрашувлар, хусусан, Чемпионлар Лигаси баҳсларида ҳам доим ўзига хос ҳаракатлари билан ажралиб турган. Уэльслик ҳозирда «Тоттенҳэм»да фаолиятини қайта тиклашга ҳаракат қилмоқда. Бэйлдаги тажриба ва маҳорат (агар ўзи хоҳласа) яна бир неча йил унга юқори даражада ўйнаш имкониятини тақдим этади.
Эден Азар — 2019 йил, 115 миллион евро
Азар — «Реал» тарихидаги энг қиммат ва, эҳтимол энг омадсиз трансфер ҳисобланади. Аммо унинг Мадридга келиб, лазарет «меҳмон»ига айланишини ким ҳам ўйлабди. Бельгиялик «қироллик клуби»га ўтганидан сўнг 1,5 йил ичида барча мусобақаларда атиги 36 учрашув ўтказиб, 4 гол ва 7 голли узатмани амалга оширди. У одатда эски жароҳати тикланиб улгурмасидан яна бошқасини (янгисини) орттириб олади. Ҳозирча Зидан қўлидан келганича уни қўллаб-қувватлашга ҳаракат қилмоқда, аммо бу яна қанча давом этишига аниқ жавоб йўқ. Азарнинг аввалги ҳолатига қайтиши нафақат Зидан ва «Реал» мухлислари, балки футбол учун ҳам ўта қувонарли ҳодиса бўларди.
Изоҳ (0)