Тошкент вилоятининг Тошкент туманидаги 26-сонли умумий ўрта таълим мактабида ўтказилган текширув якуни бўйича мактаб директори С.Х. (аёл) томонидан жами 173 843 900 сўмни растрата қилиш йўли билан талон-торож қилинганлиги аниқланди, деб хабар бермоқда вилоят прокуратураси матбуот хизмати.
Ҳолат юзасидан унга нисбатан 2020 йил 10 декабрь куни Жиноят кодексининг 167-моддаси 3-қисм «а» банди (кўп миқдорда ўзлаштириш ёки растрата йўли билан талон-торож қилиш) ва 209-моддаси (мансаб сохтакорлиги) 1-қисми билан жиноят иши қўзғатилган. Дастлабки тергов давомида С.Х. туман Халқ депутатлари кенгаши депутати бўлганлиги аниқланган.
Шу сабабли уни депутатлик дахлсизлигидан ечиш ва жиноий жавобгарликка тортиш учун розилик олиш учун туман Халқ депутатлари кенгашига тақдимнома киритилиб, жиноят иши Жиноят процессуал кодекснинг 364-моддаси 1-қисми 1-бандига асосан ҳаракатдан тўхтатилган.
2021 йил 14 апрелда С.Х. депутатлик дахлсизлигидан ечилганлиги ва жиноий жавобгарликка тортиш туман Халқ депутатлари кенгашидан розилик олинганлиги сабабли шу куни иш юзасидан тергов ҳаракатлари тикланган.
«Ҳозирда жиноят иши бўйича дастлабки тергов ҳаракатлари олиб борилмоқда ва тергов якуни бўйича қонуний қарор қабул қилиниши таъминланади», — дейилади вилоят прокуратураси хабарида.
Аввалроқ Тошкент вилоятининг Ўрта Чирчиқ туманида мактаб таъмирига ажратилган 242 миллион сўм талон-торож қилингани, Самарқандда мактаб қурган фирманинг раҳбарлари 631,7 миллион сўм маблағни талон-торож қилгани, Қорақалпоғистоннинг Чимбой туманида мактаб филиали биносини реконструкция қилиш учун ажратилган маблағдан 105 миллион сўм талон-торож қилингани, Жиззахдаги мактабда 200 миллион сўмдан ортиқ бюджет маблағлари талон-торож қилингани ҳақида хабар берилган эди.
