ДХХ Наманган вилояти бошқармаси ҳамда вилоят ИИБ ходимлари ҳамкорлигида ўтказилган тезкор тадбирда Андижон вилояти Хўжаобод туманида жойлашган «Дўстлик» халқаро назорат ўтказиш масканида Наманган шаҳрида яшовчи аёл ўзининг 2 нафар танишини Туркияга фоҳишалик қилиш мақсадида олиб кетаётган вақтида ушланган. Бу ҳақда ДХХ матбуот хизмати «Дарё»га маълум қилди.
Аниқланишича, 34 ёшли Н.Н. 2021 йилнинг март ойида Туркиядан доимий яшаш манзилига қайтиб келгач, 28 ҳамда 31 ёшли икки нафар таниш аёлни Истанбул шаҳрида фоҳишалик билан шуғулланиб, пул топишга қизиқтирган.
Сўнг Туркияга Қирғизистон орқали кетишларини айтиб, уларга ўз ҳисобидан Бишкек—Истанбул авиарейсига чипта олиб берган, шунингдек, виза ҳамда чет элга чиқиш паспортлари учун тўловларни ҳам амалга оширган.
«Бу билан уларни ўзига моддий жиҳатдан қарам қилиб, манзилга етиб борганларидан кейин бир ой давомида фоҳишалик қилиш орқали сарфланган йўл харажатларини қоплашларини ҳамда ҳар ойда ишлаб топган пулларининг 30 фоизини беришларини талаб қилган», — дейилади хабарда.
Таъкидланишича, Н.Н. Туркияда бўлган даврида Ўзбекистондан борган аёлларни фоҳишалик билан шуғулланишга мажбурлаб келган. Ҳозирда унга нисбатан Жиноят кодексининг 135-моддаси (одам савдоси) билан жиноят иши қўзғатилган.
Аввалроқ Анқарада аёлларни қўрқитиб, фоҳишалик қилишга мажбурлаб келган жиноий гуруҳ қўлга олингани, Навоийда бошпанасиз қизга ўз уйидан жой бериб, уни фоҳишаликка мажбурлаган аёл ушлангани, Жиззахда 3 нафар аёлни фоҳишалик қилиш учун Туркияга жўнатаётган 21 ёшли йигит қўлга олингани ҳақида хабар берилганди.
Изоҳ (0)