Ўзбекистон Республикаси олимлари томонидан яратилаётган икки вакцина – Инновацион ривожланиш вазирлиги ҳузуридаги Илғор технологиялар марказининг коронавирус S оқсили асосидаги рекомбинант вакцинаси ҳамда Фанлар академиясининг Геномика ва биоинформатика марказининг SARS-CoV-2 оқсил бўлагининг уч соҳаси: pcDNA3 1 (+) плазмидасига қўйилган NTD, RBD ва HR1-HR2 вакцинаси Жаҳон соғлиқни сақлаш ташкилотининг номзод вакциналар рўйхатига киритилди. Бу ҳақда «Дарё»га Инновацион ривожланиш вазирлиги хабар берди.
Ҳозирда мазкур икки вакцина клиник олди синовлардан ўтмоқда.
ЖССТнинг маълумотлар базаси COVID-19 вакцинасига қарши номзод-вакциналар тўғрисида тўлиқ маълумотларни йиғиб боради. Мазкур база мунтазам равишда, ҳафтасига икки марта янгиланади. Унда COVID-19’га қарши номзод-вакциналарнинг клиник ва клиник олди жадвали келтирилган бўлиб, номзод-вакциналарни таҳлил қилиш имкониятини беради.
Ҳар бир вакцинанинг 1-фаза, 2-фаза ва 3-фаза синовлари кузатилади. Вакциналарнинг хавфсизлиги ва самарадорлиги тўғрисидаги илмий мақолаларга ҳаволалар берилади. Шунингдек, бу база ҳар бир номзод-вакцинанинг асосий хусусиятлари тўғрисидаги маълумотларни ўз ичига олади.
Ўз навбатида мазкур платформа орқали COVID-19 қарши яратилаётган вакциналар турли критерийлар, хусусан вакцина платформаси, вакцинация графиги, қўллаш усули, ишлаб чиқарувчиси, синов фазаси, клиник натижалар бўйича таснифланган.
Бундан аввал Ўзбекистонда коронавирусга қарши эмланганлар сони 370 мингга яқинлашгани, Ўзбекистонда коронавирусга қарши эмланганларга онлайн-маълумотномаларни бериш бошлангани ҳамда Ўзбекистонда ҳайвонлар учун COVID-19 вакцинаси синовдан ўтказилиши ҳақида хабар берилганди.
Изоҳ (0)