Бугун,

  • USD 11095.31
  • RUB 173.84
  • EUR 10772.44

АҚШнинг Moderna фармацевтика компанияси 2021 йилнинг иккинчи чорагида ўзининг коронавирусга қарши вакцинасини Канада ва Буюк Британияга режалаштирилганидан камроқ етказиб беради. Бу ҳақда компаниянинг CNN’га берган маълумотига таяниб, «РБК» хабар берди.

Фото: AP Photo

Фото: AP Photo

«Мавжуд талаб, таъминот ва тақсимотни ҳисобга олган ҳолда, Moderna иккинчи чоракда бир қатор мамлакатларга, шу жумладан, Канада ва Буюк Британияга вакцина етказиб бериш ҳажмини кутилаётганидан камайтиради», — дейилади компания хабарида. Moderna вакцина таъминоти қанчага камайиши ва бу танқисликни қачон ҳал қилиш мумкинлиги ҳақида маълумот бермади.

«Вакцина ишлаб чиқаришни кенгайтириш траекторияси бир текис эмас ва барча саъй-ҳаракатларга қарамай, Европа таъминот занжирида илгари режалаштирилган дозаларнинг танқислиги мавжуд», — дея компаниянинг сўзларини келтирди The Wall Street Journal.

«Вакцина ишлаб чиқариш жуда мураккаб жараён. Таъминотнинг беқарорлигига эса бир қатор омиллар, жумладан, инсон омили ва моддий ресурслар сабаб бўлди», — дея қўшимча қилди Moderna. «Энг қисқа вақтда» барқарор таъминотни яратиш учун компания ўз шериги, Швейцариянинг Lonza компанияси билан ишлайди ва, шунингдек, «барча ҳукуматлар билан яқин алоқада бўлади», дейилади хабарда.

Коронавирус билан касалланганлар сонининг кескин ортишини бошдан кечираётган Канада Moderna вакцинаси етказиб берилишининг қисқариши муносабати билан «ҳафсаласи пир бўлганини» маълум қилди. «Бизнинг ҳукумат Moderna’дан ўз мажбуриятларини бажаришини талаб қилишда давом этади», — деди Канаданинг  жамоат ишлари ва харидлар вазири Анита Ананд. Унинг сўзларига кўра, апрель ойи охирида компания мамлакатга вакцинанинг кутилганидан деярли ярми — 1,2 миллион дозанинг ўрнига 650 минг доза етказиб бермоқчи.

Буюк Британия ва Канададан ташқари, Moderna коронавирусга қарши вакцинани етказиб бериш бўйича Япония, Жанубий Корея, Швейцария, Исроил ва бошқа бир қатор мамлакатлар билан шартнома имзолаган. Январь ойи бошида  Европа Иттифоқи томонидан ушбу препаратни қўллаш маъқулланган эди.

Аввалроқ Литвада 78 ёшли эркак коронавирусга қарши Moderna вакцинасининг иккинчи дозасини олганидан сўнг вафот этгани ҳақида хабар берилганди.

Moderna биотехника компанияси ўзи ишлаб чиқарган вакцина устида олиб борилган тадқиқотлардан сўнг препаратнинг самарадорлик даражасини пасайтирди. 2020 йил декабрь ойида Moderna вакцинасининг самарадорлиги 94,1 фоизга баҳоланган эди. Ҳозир маълум бўлишича, препарат 90 фоиз ҳолатда инфекцияни юқтиришнинг олдини олади, касалликнинг оғир шаклидан эса 95 фоиз ҳимоя қилади. 30 мингдан ортиқ одамни қамраб олган клиник синовларнинг учинчи босқичи натижалари бўйича ушбу хулосага келинган.

Шунингдек, Moderna коронавирус вакцинасини олти ойликдан 12 ёшгача бўлган болаларда синашни бошлаган эди. Синов жараёнида, тахминан, АҚШ ва Канададан 6750 нафар бола қатнашиши режалаштирилган.

Маълумот учун, АҚШ Озиқ-овқатлар ва дорилар сифати бўйича бошқармаси (FDA) 18 декабрь куни Американинг Moderna фармацевтика компанияси томонидан ишлаб чиқарилган коронавирусга қарши вакцинани мамлакатда қўллаш учун рухсат берган.

Изоҳ
Асосий янгиликлар
Иқтисодиёт
Коррупция даражаси, иқтисодий эркинлик индекси: Ўзбекистоннинг халқаро рейтинглардаги ўрни қандай ўзгармоқда?
Дунё
АҚШ Ельциннинг Украина ҳақидаги баёнотини махфийликдан чиқарди
Иқтисодиёт
Ўзбекистонда фрилансерлик: улар қанча маош олади ва нега кўпаймоқда?