Буюк Британияда коронавируснинг янги мутациялашган штамми аниқланди, мазкур штамм илк бор Ҳиндистонда қайд этилган эди. Бирлашган Қиролликда коронавирус инфекциясининг янги штамми билан касалланиш бўйича жами 77 та ҳолат кузатилган. Бу ҳақда мамлакат жамоат соғлиғини ҳимоя қилиш хизмат хабар берган.
Штаммга B1617 деб ном берилди. У Буюк Британия ҳудудидаги 73 нафар беморда ва Шотландиядаги 4 нафар кишида учраган. Олимлар касалликнинг янги вариантини «ўрганилаётган штаммлар» туркумига киритган.
«Янги штаммда иккита оқсил мутацияси амалга ошган, шу сабабли уни Жанубий Африка ва Бразилия вариантларидан фарқли ўлароқ вакцина билан жиловлаш қийин кечади», – деган Шарқий Англия университети тиббиёт фанлари профессори Пол Хантер.
Мамлакат ҳукумати Қироллик ҳудудига Ҳиндистондан келувчиларнинг киришини қатъий назорат қилишга қарор қилган.
Эслатиб ўтамиз, бутун дунёда COVID-19 коронавирус инфекцияси билан касалланган одамлар сони уч миллион нафардан ошган. 2020 йил 11 январда энг биринчи бемор коронавирус асоратлари оқибатида ҳаётдан кўз юмган эди.
13 апрелда Анголада коронавируснинг 34 та мутацияли янги штамми аниқлангани, февраль ойида эса Норвегияда коронавируснинг янги штамми тарқала бошлагани, Финляндияда коронавируснинг янги мутациясига дуч келингани ҳақида хабарлар берилган.
Изоҳ (0)