Вазирлар Маҳкамасининг қарори билан Халқаро имтиҳон тизимлари бўйича юқори балл (даража) олган ёшларга имтиҳон топшириш харажатларини тўлиқ қоплаб беришнинг маъмурий регламенти тасдиқланди, деб хабар беради Telegram’даги «Ҳуқуқий ахборот» канали.
«Gazeta.uz»нинг ёзишича, харажатларни қоплаш учун фақат имтиҳон топшириш пайтида 31 ёшга тўлмаган Ўзбекистон фуқаролари ва Ўзбекистонда доимий яшовчи фуқаролиги бўлмаган шахслар Давлат хизматлари марказлари ёки Ягона портал орқали мурожаат қилишлари мумкин бўлади.
5 та халқаро имтиҳон тизими (IELTS, TOEFL, GMAT, GRE, SAT) бўйича компенсациялар 2021 йил 1 майдан бошлаб тўланади, яна 13 та имтиҳон тизими бўйича харажатлар 2022 йил 1 январдан қопланишни бошлайди (яъни имтиҳон харажатлари юқорида белгиланган санада ёки ундан кейин имтиҳон топширган ёшларга қоплаб берилади — таҳр.).
Халқаро имтиҳон тизимларида сертификат олган ёшлар 180 кунда давлат хизматлари марказларига ёки ЯИДХП орқали («My.gov.uz») мурожаат қилиши лозим бўлади.
Таъкидланишича, Давлат хизматлари маркази 10 дақиқада, ЯИДХП орқали эса автоматик тарзда ҳужжатлар Ёшлар ишлари агентлигига юборилади. Агентлик эса 15 кунда аризачининг сертификатини верификациядан ўтказади.
Сертификат ҳақиқийлиги тасдиқлангач, 15 кунда компенсация маблағлари агентлик томонидан Халқ банкига ўтказилади ва ариза берувчига SMS хабар юборилади.
Эслатиб ўтамиз, 2020 йилнинг 25 декабрида Ўзбекистон ёшлари форумида иштирок этган Президент Шавкат Мирзиёев халқаро таълим дастурлари бўйича энг юқори балларни тўплаган ёшларга имтиҳон топшириш харажатлари тўлиқ қоплаб берилишини маълум қилганди.
Изоҳ (0)