Фуқаролик ишлари бўйича Фарғона туманлараро судининг судьяси хизмат вазифасини бажараётган вақтида зўравонликка учради, деб хабар беради Судьялар олий кенгаши матбуот хизмати.
Маълум қилинишича, 13 апрель куни фуқаролик ишлари бўйича Фарғона туманлараро судининг судьяси (аёл) Фарғона тумани «Илғор» МФЙ Саховат кўчасидаги низоли хонадонга эксперт билан борган. Ҳолатни жойида ўрганаётган судьяга фуқаролик ишига алоқадор бўлмаган М.Н. исмли шахс жисмоий куч ишлатиб, қўлидаги шахсий мобил телефонини тортиб олган ва ерга уриб қасддан синдирган. Шунингдек, у жамоат жойида судьяни унинг қадр-қимматини камситувчи сўзлар билан ҳақоратлаган.
«Фуқаро М.Н.нинг бундай ғариқонуний ва ғайриахлоқий хатти-ҳаракатлари низоли иш бўйича тайинланган экспертиза ўтказилмай қолишига олиб келади. Мазкур ҳолат бўйича Судьялар олий кенгаши ваколати доирасида керакли чораларни кўрди. Воқелик ҳуқуқни муҳофаза қилувчи идоралар томонидан ўрганилмоқда. Натижаси бўйича қўшимча ахборот берилади», – дейилади баёнотда.
Аввалроқ Андижонда суд раиси судьялик одоб-ахлоқини бузгани учун ишдан олингани тўғрисида хабар берилганди.
Изоҳ (0)